اه اه اه...براحه يا دكتور لسه حاسس...حرام عليك. -طيب...هديك حقنة بنج كمان. أي أي أي أي... إيه ده يا دكتور..حرام عليك...برده حاسس. -حضرتك دي تالت حقنه بنج... أنا لو بسرق البنج مش هدلدقه في بقك كده...حس بيا...حس بيا يحس بيك ربنا أعمل إيه أنا بشر يا دكتور وحاسس أي أي أي أي. -يبني أنا جيت جمبك دلوقتي..."أي" إيه بس... طب هديك كمان حقنه أهو. بعد 10 دقائق: اه اه... حاسس حاسس بجد...بموت مش قادر -ياسيدي دي رابع حقنة اديهالك... ده بنج مستورد تركيز 4 %... أعملك إيه تاني. يعني أنا بتدلع يا دكتور !!... أنت مستخسر فيا البنج !! هو أنا مش دافع كشف ولا إيه ! وبعدين هو ده الخلع بدون ألم. - أها..قولتلي !! أنت بتخلص حقك بالكشف.. طيب يا سيدي..أنا هديك بنج بقي هيجيب معاك من الآخر * بطلع سرنجة 3 سم... مخصصة لحقن العضل مليئة بسائل محمر اللون ماله يا دكتور البنج لونه أحمر كده ليه !! - ده أحدث أنواع البنج.... افتح بقك وادعيلي. بعد دقيقتين: دكتور حاسس بسخونة في خدي ونص وشي اليمين. - عارف أنا بتعب قد إيه عشان أجيب البنج ده...وبجيب العلبة ب 150 جنيه بعد ماكنت بجيبها ب 75 جنيه عشان السوق السوده والبنج ناقص. دكتور محمد عيني اليمين مش شايف بيها! -عارف لما يجي كل عيان زيك..بيتدلع واديله بدل الحقنة 2 و3 و4 عشان متخيل أنه بكده بيخلص حقه بالكشف اللي دافعه...عارف أنا كده بخسر قد إيه...وكل ده عشان إيه كشف ب 10 جنيه دكتور..مش قادر أحرك نص لساني...ولا شفايفي! - أنت ملكش ذنب.. بس هي تراكمات من كذا عيان من عينتك دي...أنا بقيت بجيب علبه البنج أخلصها على 10 عيانين بدل ما المفروض تخلص على 50...يعني أنا صارف عليك 15 جنيه...وأنت بتذلني ب 10 جنيه أنت اديتني إيه يا عم الدكتور أنت... لساني كله تقل..أنا بخرج كلام بالعافية..ونص وشي نار وبمووت -معلش....متقلقش...حقنه الفورمالين...زمانها اشتغلت... يلا نخلع ومش هتحس بأي حاجه خالص...عشان أعصاب وشك اليمين كلها اتحنطت يا حشرة...يلا هوبااااا..ضرسك أهو....ها حسيت بحاجه !!! خلع بدون ألم أهو. إيه..إيه.. إيه إيه إيه. "ايموشن صم وبكم".