يوميات دكتور متعذب.. ألف سلامة يامدام!

ألف سلامة عليكي يامدام!
-ضرسي هيموتني يا دكتووور ... أنا عاوزة أخلعه وأخلص من أمه
(ايموشن مرتضي منصور)
-! وريني كده حضرتك ... آه ضرس العقل واصل للعصب ولازم يتخلع فعلا
-ما انا عارفة ... هو أنا عبيطه؟! شوفته في المرايا قبل ما اجي لك .. ده بقى له يومين واجعني، بس امبارح زاد أوي، وخلا فكى كله بيصرخ عليا
-لا.. ألف سلامه على فكك ... طب بعد إذنك افتحي بقك عشان اديكي البنج
بعد 5 دقايق :
- ...تسلم ايدك يا دكتور ... أهو الوجع راح ...عارف يا دكتور والله امبارح اخدت كل حاجه ... كيتوفان وكيتوبريك ...وكيس فوار من أبو 2 جنيه ده .. وبروفين ومعملوش حاجة ... لحد ما رفعت نص قرص والله
-رفعتي نص قرص ازاي !!
-نص قرص ترامادول ! ..... هو مش كان ترامادول يا حوده !!
**حوده جوزها من الخلفيه: ايوه نص ترامادول ...وماجبش معاها يادكترة
-وبالرغم من كده معملش اي حاجه والله
مين اللي معملش بالظبط !! حوده ولا القرص (ايموشن حمدي الوزير )
بعد الخلع
-انا هكتبلك مضاد حيوي ... هتاخدي قرص كل 12 ساعة لمدة 4 ايام
-طب اكتب لي مسكن قوي بقى والنبي
- لا المسكن ده بقى على حوده ... ممكن لو حصل وجع ترفعي نص القرص التاني ..ده بعد إذن الاستاذ حوده ..إن ما كانش عاوزه في حاجه تاني طبعا.