يوميات صيدلى فى الأرياف..اقفش

مسا مسا
إزيكو ؟
النهاردة ح أحكيلكو على موقف حصلى إمبارح واكتشفته النهاردة
امبارح بالليل وانا خلاص بقفل الصيدلية انا وسليمان جالى اتنين راكبين موتوسيكل ولما شافونى بقفل الصيدلية وقفو جنبنا وواحد منهم نزل وقاللى
- معلش يا دكتور بالله عليك تفتح تانى الصيدلية انا مش لاقى حد فاتح واقرب صيدلية خدمة ليلية لسه بعيد , عاوز الدوا دة ضرورى علشان امى تعبانة والدوا دة اللى بيريحها وبيخليها كويسة
- دوا ايه دة ؟
- دة مسكن يا دكتور .. بالله عليك تفتح الصيدلية من تاني
عارفين يا جماعة دة لو دوا ينفع يتأجل مكنش ح يبقى فيه مشكلة لما اخليه لبكرة لكن المسكن بالذات حاجة صعبة ان المريض يقضى الليل أو حتى جزء من الليل بالوجع
أنا طبعا فتحت الصيدلية من تانى بس المرة دى من غير ما اشغل النور لانى عارف مكان الدوا اللى الاخ دة عاوزه ... عادى يعنى ودخلت على طول واديت له الدوا وادانى 100 جنيه وقاللى : معاييش فكة والله
انا كمان لسه ح افك الفلوس ؟
ع السريع كدة اديته الباقى ومشى وقفلت أنا وسليمان ومشينا
أقوللكو بقا انا اكتشفت ايه النهاردة
انا لسه داخل الصبح لا بيا ولا عليا وبفتح الدرج لقيت ايه بقا
لقيت ال100 جنيه بتاعة صاحبنا بتاع امبارح .. بس شكلها غريب
متغير شوية .. فيها حاجة غلط
أخدتها كدة وبصيت لها لقيت ألوانها غريبة .. تؤ .. شكلها مش مريحنى
طلعت 100 جنيه من جيبى وقارنت الاتنين ببعض
اوباااا .... إقفش ... ال 100 جنيه طلعت مضروبة .. مزورة .. اة والله ..
بقا كدة ؟؟ دة كلام يا جدعان .. يعنى الواحد يعمل ايه بس ؟
على فكرة انا فاكر شكل الاتنين دول
بصوا .. أنا رحت عملت محضر فى القسم ..
و الضابط الصراحة عمل الواجب وزيادة
الراجل عمل كل حاجة بجد ... فتح المحضر واخد الاوصاف وحرز الفلوس وقاللى خلاص يا د هاشم روح انت واحنا هنقوم باللازم ولو وصلنا لحاجة ح نديك تليفون
ياللا ماشى كله خير
بعد ما خرجت من القسم نزلت المدينة اشترى شوية أدوية ومستلزمات للصيدلية .. تقريبا حوالى ساعتين قضيتهم فى شراء النواقص بتاعة الصيدلية وشوية ولقيت تليفونى بيرن , رديت لقيت سليمان بيقوللى تعال بسرعة يا د هاشم فيه هنا ناس من الحكومة وعاوزينك
انا استغربت اوى
معقول الحكومة جابت العيال بتوع ال100 جنيه بسرعه كدة
واضح ان الشرطة هنا مسيطرة ع اللآخر .. اكيد كمان ان الارياف مش ح تبقا زى المدينة وح تكون صغيرة ومحكومة
وصلت الصيدلية ودخلت جوة لقيت اتنين رجالة قاعين بيشربو الشاى مع سليمان
انا شديت كرسى وقعدت معاهم
- سلامو عليكو
- و عليكم السلام ( جماعة )
- انا د هاشم صاحب الصيدلية
- اهلا يا دكتور احنا من المديرية جايين نعمل تفتيش على الصيدلية
- اها .. اهلا وسهلا
شفتو ؟ اهو احنا جبنا سيرتهم فى الحلقة اللى فاتت .. جم أهم على السيرة .. ربنا يجعل كلامنا خفيف عليهم
و انا اللى كنت فاكرهم من الداخلية
- عاوزين منك يا د هاشم الورق والتراخيص وافتح لنا الثلاجة
- أة طبعا طبعا اتفضلو كل حاجة فى السليم فتشوا براحتكو
الاتنين دول بدأوا يشوفوا اصناف التلاجة وكمان يدعبسوا كدة فى الارفف
سليمان : هو فيه ايه يا دكتور ؟
انا : لا ولا حاجة متخافش يا ريس كله تمام احنا معندناش حاجة نخبيها
سليمان : طيب يا دكتور بدل الدعبسة دى ما تشوفهم وخلاص
انا : اسكت الله يخربيتك ح تودينا فى داهية .. الناس دول مش بتوع الكلام دة
اقفش
الكلمة دى طلعت من واحد منهم وهو ماسك علبة طلعها من وسط العلب فى رف الأمبولات
أنا : ايه فى ايه ؟
مفتش 1 : اكسباير وتاريخها 2013
انا : ازاى الكلام دة ؟
مفتش 2 : ورينى كدة ...لا يا ريس دة تاريخها 2018 بس ال 3 قريبة من ال 8 بالانجليزى انت بس ما اخدتش بالك وبعدين هو فيه علبة تاريخ انتاجها 2015 تخلص فى 2013
انا : اها .. الحمد لله .. تمام
الناس بتوع التفتيش خلصوا وكتبو محضر التفتيش ومضوا ومضونى عليه
انا : تمام ؟ .. شغل على ميه بيضا ؟
مفتش 1 : تمام طبعا الا بقوللك ايه يا دكتور
انا : اؤمرنى
مفتش 1 : انا عاوز منك علبتين من الانسولين اللى جوة فى التلاجة دة
انا : آة وماله وماله .. ح تدفع كام ؟ ههههه بهزر ولا يهمك ... طب اوكى .. حاجة تانية ؟
مفتش 1 : اة والنبى ادينى اختبار
انا : سكر ؟
مفتش 1 : لا حمل ؟
مفتش 2 وانا فى نفس واحد : نعم ؟
مفتش 1 : اة يا جماعة .. دة لمراتى ولا مؤاخذة
انا : اة ماشى ماشى معلش ... اقفش .. قصدى اتفضل
مفتش 1 : شكرا يا دكترة .. لو عزت اى حاجة من المديرية تعالالى بس انا ح اعمل معكا الواجب كله
انا : اة طبعا طبعا ان شاء الله
كدة الحمد لله عدت على خير
على فكرة فى الغالب مفيش حد بيعمل زى المفتش دة بس دة يعتبر من شواذ القاعدة
مفيش أحسن من المشى السليم وربنا يبعدنا عن الحرام
كفاية تنشنة بقا واقوللكو على خبر حلو
كتب كتابى على عهد بعد اسبوعين ان شاء الله
الفترة الجاية ح تبقى زحمة أكيد وان شاء الله تعدى على خير
اشوفكو فى الحلقة الجاية
سلامو عليكو