كل ما قنديل يغني

( أشعار بالعامية المصرية )
الشاعر سمير الهواري
كل ما قنديل يغني
يا بو سمره
بسمع امي
والتقيني بشورت إسود
والقميص أبيض مزهزه
والطريق بيقولي إحود
والقى نفسي ف حضن أمي
والقى وشك
يامه ليه دايما بغشك
يوم ما فتّك
قلت هرجع
والطريق نداهه قاسيه
خدني خطوي بسكه عاصيه
تهت منك غصب عني
كل ما قنديل يغني
عارفه يامه
الحياه من غير عيونك
سكه ضلمه
كنت بتغطى بعيونك لما انام
واغزل الشوق من ضفايرك
فرشه ليا
ولما ليل الغربه يسبي دموع عنيا
كنت اقول لساها ليا
والقى قلبي طير حمام
له عيون وجناح كسير
ورغم علة غربته بيعرف يطير
وبجناح حبك حملني
كل ما قنديل يغني
كنت بصحى الصبح أسمع
يابو سمره
إصحى يلا
همس إيدك فوق جبيني
لسه فاكر
مشط أخضر
كت سنانه مكسره
كنت اجره تحت حرف المسطره
واكسر سنانه
من حنانه
كان له صوت
لسه صوتك بيناديني
مش هترجع
لسه بسمع
صوت حنانك يسري فيا
وبحنين الشوق عجنّي
كل ما قنديل يغني
في عيدك يامه بندهلك بعلو الصوت
وقطر الحزن يدهسني وعليا يفوت
ومين يسمع صدى صوتي
ويفهم حزني وسكوتي
وليه ياخدك ملاك الموت
بلوعة قلب انا جيتلك
هجرت ذنوبي ومشيتلك
بعفر خدي على بابك
واولع عمري باعتابك
وبترجى ندى ترابك
يخضر حضن ويشيلني
كل ما قنديل يغني