أمى.........قصيده بالعامية المصرية

حبيبة قلبى ياأمى
يا درة تاج على جبينى
فى يوم عيدك أنا جيتك
بقلبى يدق فى شمالى
وعمرى الجاى فى يمينى
يا منحة ربنا ليا
يا عايشه نبض فى ضلوعى
يا داخله جوه تكوينى
ده قربك جنة الدنيا
وبعدك نار بتكوينى
أنا جيتك فى يوم عيدك
أبوس ايدك
أشوف الجنه فى عيونك
واعيشها تحت أقدامك
و انور بيكى نور عينى
يا رحمة ربنا بينا
يا لمسة ربنا الحانى
على شعرى وانا صغير
على كتفى وانا راجل
اليكى يعود حنين قلبى
ليوم موتى وتكفينى
دى نظره واحده تكفينى
دى لمسه واحده من ايدك
على خدى تنسينى
هموم الدنياأجمعها
وبتخلينى أجمعها
وأرميها على بابك
أنا المجذوب بأعتابك
أنا أول مريدينك
حبيبتى يا مه ضمينى
همومى هدت الكاهل
ومحتاج لك وانا راجل
بنفس القوه ياأمى
و محتاج مين يشيل همى
ونفسى ارجع رضيع تانى
على قلبك ينام خدى
و دقة قلبك اسمعها
و يرقص قلبى م الفرحه و وجدانى
بايدك تمسحى راسى
و ترقينى
وتطوينى....تدفينى
تغنى لى وانا ف حجرك
تودينى
لعالم تانى من صنعك
و تنسينى
أنا نفسى أعود ليكى..كما الأول
وآخد حضن وأطول
أنا نفسى أعود ليكى.رضيع تانى
و لولا الخوف على تعبك
لقلت ارجع..........جنين تانى