ح أقدم أستقاله

ح أقدم استقاله ودي أخر قواله
عشان اكمل معاهم خلاص بقت استحاله
خلاص أنا اتهديت من تعبي ف شغل البيت
وتعبت من الغساله عطلانه مش شغاله
أأقول هات سمنه وزيت دايما يقوللي نسيت
ف البيت رايحه جايه بانضفله ف التكيه
وأقولّه الحق البوتاجاز يقوللي هو باظ
وهو قدام المرايه وأنا قاعده مستحيه
وهات بامبرز للعيل وهات صابون وأريال
يعمل مش سامعني وانا منه مستويه
لاطلبت لحمه ولا فراخ وراضيه بأي حال
وهو شادد حيله ومش شايفني ميه الميه
ولو جت فاتورة الميه يفضل يبكت فيا
يتهمني بالتبذير ويقوللي فين التوفير
وياخرابي ع الكهربا ومصيبتي ف الفواتير
يقوللي ماتدفعيها هو انا كله عليا
ولو كان ع السلم طالع أناديه يعمل مش سامع
وأنا عارفه اللي عليا ويقول مش تامر فيه
وح أقدم استقاله وده كلام رجاله
لوقطعت صوابعي العشرة أمبارح والنهارده وبكره
بالذمه ده عاجبكم ولا ده زوج أخر نداله
خلاص ح أقدم استقاله وحياتكم يا رجاله
هي الست تتجرأ ف يوم تعمل نداله ؟
مع تحيات / شاعرة البحر