انا مش معاهم

_انا مصريه أبا عن جد وزيى زى أى واحد فى الدنيا بيحب بلده ونفسه انها تكون أجمل بلاد الكون _وده من أبسط حقوقى على فكره _ عشان كده لما قامت الثوره قلت وماله أهى مهما ساءت مش حتسوء عن الحاله اللى وصلنالها ، ويوم ورا يوم وخطوا ورا التانيه العالم كله بقا بيتكلم عن شباب مصر اللى أكدوا أنهم أحفاد للفراعنه ، وسقط النظام ، وأتباعوا وقعوا واحد ورا التانى ، وبدأنا إحنا نحلم ونتهيأ للطريق الوردى اللى حتبقى عليه بلدنا بعد ما اتخلصنا من الكابوس اللى كان طابق على نفسنا ، بس للأسف شكلها وسعت مننا على الأخر وسرحنا فى أحلامنا ونسينا مشوارنا ، وإتخيلنا اننا خلاص قضينا على الفساد ونسينا أن طول مدته صنعت منه جزور مش من السهل اننا نقضى عليها .
_لا واللى زاد وغطى اللى كانوا لابسين أقنعة المعارضه وقال هما اللى حيحمولنا الثوره ....الليله كلها فكرتنى بأم فاروق اللى روقت بيتها وظبتته وقال رايحه توصى عليه جارتها بنت حرامى الشقق ونسيت ان العرق يمد لسابع جد :D
_ما علينااااااااااا نهاية المشوار انا كتبت الحوار ده كله عشان اقول حاجه واحده ان انا مش معاهم لا مع مناهضين ولا حتى معارضين ، انا زيى زى اى مصرى حر ، رفعت راسى زمان وقلت انا أجدادى فراعنه وبفضل شباب مصرى حر قدرت انى اقول انا من جيل الثوره وحلمت انى أحكى لولادى ازاى انا وكل جيلى قدرنا نبنى بلدنا ونعمرها تانى ونحولها لجنه ونرجعلها مكانتها اللى تستحقها بين كل الدول ....حتى ده بقى حلم ؟؟؟هو احنا حتى منستحقش اننا نحلم حلم زى ده ؟؟؟!!!!!!!!!.......
_محدش يقدر ينكر ان اللى بدأ الثوره هما شباب مصر الحر وانهم ممكن يكونوا سبب فى ضيعها من ايدينا لانهم وبكل بساطه سلموا القط مفتاح القرار ، لما اتخيلنا ان كبار معارضى النظام السابق هما افضل حارس على كل النجاح اللى حققناه ونسينا انهم كانوا جزء من مسرحيه هزليه اتخدرنا بيها سنين ، وحتى لو افترضنا انهم مظلومين وبيحموا البلد بجد على الرغم من ان صمتهم السنين اللى فاتت دى عليه الف استفهام؟؟؟؟؟ بس 99% من شهداء الثوره شباب يعنى الشباب بس هما اللى ليهم الحق يقولوا هما عاوزين ايه ..انا عن نفسى مش بنتمى لا لاى حركه ولا اى حزب سياسى ومش عاجبنى اى اتفاق ولا قرار بياخدوا ناس ملهمش حق ياخدوه اصلاااا ..انا مش معاهم انا مع كل شهيد ضحى بدمه عشان بلدنا تبقى احسن ، انا مع كل صوت حر نزل يوم 28 يناير عشان يقول انا حر انا مع كل واحد حيقف وحيقلهم انا مش معاكم .....ارجوكوا يا شباب مصر يالا نرجع تانى نكمل مشوارنا.....