شربت شاى بالياسمين

فى مجتمعنا أصبحت الرشوه شىء أساسى أصبح بيع الكلمه والضمير عادى
يعنى زى كده ما بنشرب الشاى ونتكيف
اهو احنا بقى بقينا نقبل الرشوه ونتكيف بيها
وعشان هى شىء محرم فى دينا وغير تقليدى فى حياتنا فكان لازم برضه يكون بنكهه غير تقليديه فبقت الرشوه فى منتهى البساطه كوبايه شاى بالياسمين
عندك مشكله فى اى مكان سيب تمن كوبايه الشاى
عندك أزمه ومش عاوزه تتحل سيب الاكراميه
والغيامه هتتشال
ناس بتبرر وتقول دى مساعده فى المعيشه
والناس أخدت على كده والرشوه بقت عيشه
وشرب الشاى بالياسمين بقى بيكيفنا اخر تكييفه
خدت جوز جنيهات وقابلهم على نفسك
ما هو عشان اكل العيال خليك انت فى نفسك
وفضلت الديراه توسع والكل يشرب ويتكيف
وما بقتش مجرد رخصه تخلص
ولا ورق يتمضى دى وصلت للمحاكم والشهادة
وصلت لمصير وحياه بنى ادمين
اجيب شويه شهود واديهم
يحلفوا ويكدبوا ومريحيين ضمايرهم
ونسيوا ان شهادتهم فى رقبتهم ليوم الدين
وان القسم بالله وعد ودين
شويه ناس متأجرين بوظوها
وشغلتهم يشربوا الشاى وييجى يخربوها
عايشيين مش بيختشوا
يقبضوا ويرتشوا
ويقفوا فى المحكمه ويحلفوا
وفى الاخر يروحوا يقفشوا
اتقوا ربنا وكفايه فساد
انتوا عار على مجتمع اساسه الاسلام
رسوله حرم شهادة الزور فى حديثه
وانتوا حللتوها وقبلتوها على نفسيكو
يلى شهدوا عليك زور ما تزعلش
ده ربك اسمه الحق والعدل
سايبهم لغايه لما ييجى الميعاد
وساعتها هتلاقى الظلم انهزم والحق عاد