حكاية عصفور

يسعد مساك يا قمر.. يسعد مساك
من كتر سهدى ياقمر.. بأسهر معاك
أنا قلبى عاشق يا قمر.. عصفور جميل
يشبه فى حسنه يا قمر ..منظر بهاك
......
قاعد فى ضل الشجر .. ومعايا كام موال
وناى حزين بين صوابعى..قال اللى ما يتقال
صحت الطيور ع الشجر ..نزلوا وقالولى
كفايه لحنك شجانا.. سهرتنا وياك
......
قلت الحكاية طويله..عصفور مدو خنى
طرت معاه فى السما..زقزقته عجبتنى
وصل لحد شطوطى .. ع الرملة واعدنى
خان الوعود يا قمر ..وبُعده سهرنى
فرق مابينا السفر .. وطار بعيد فى سماك
......
قالت الطيور يا حزين .. إوصف لنا شكله
وإزاى حنعرف طريقه .. وفين مكان أهلله
يمكن لأجل خاطرنا .. يرجع إليك تانى
وبعد طول الغياب ..تلقى الحبيب وياك
.....
أنا قلت طيرى جميل.. وحسنه ما وصفشى
من حسنه غار الجميع..وطبعه ما تقولشى
والسحر جوه عيونه .. يجذب ما يبعدشى
وعيونه فوقهم سهام .. بتصيب ما تجرحشى
أما مكانه يا طير ..بجوار جبل عالى
يطل على بحر أحمر..وموجه مش عالى
وتحت موجه حدايق .. مرجان من الغالى
وبيته وسط الصفا .. على بابه ياسمينه
عطر زهورها الجميله .. يدخل من الشباك
....
قالولى طيرك يا ولدى .. مكانه والله صعيب
دور على حد تانى .. أو روح لسيدى غريب
يمكن ببركة مقامه .. تلقى الوصال قريب
وإرجع لربك وإدعى .. تلقى الرضا جواك