وحشتينى ياعصفورة

وحشتينى ..وحشتينى
يمين الله.. وحشتينى
وحشنى الحب فى عيونك
وحشنى السحر فى جفونك
وحشنى طيف على الميّه
يلاغينى.. ويغرينى
وحشتينى
يا عصفورة ..يا غندورة
يا بنت الإيه.. يا مغرورة
أنا سواح ..ياجنيه
سافرت كتير
وطول عمرى ما بين الشط والميه
وشفت كتير
صبايا ع الشطوط نايمة
عيونهم للرفيق هايمة
وخوفى من غضب ربى
غضضت الطرف بعنية
ولطفه كان بيحمينى
وحشتينى
وبعد السير وترحالى
رجعت لبلدى وعيالى
خلى البال
وكام موال بيحلالى
أغرد للطيور وحدى
وأمسح بالزهور خدى
لدمعة نازلة من عينى
لحد ف يوم ما جيتينى
ومن نبعك رويتينى
ووعد جميل
مع مواويل
على لقيا تهدّينى
وحشتينى
وجتينى يا عصفورة
يا بنت الإيه يا مغرورة
دخلتى جوا بستانى
بكلمة حب مشهورة
سمعها قلبى طار منى
وطرتى بيه يا عصفورة
ومن يومها وأنا بغنى
واشكى للطيور همى
وأقول يمكن تلاغينى
وتنسى الهجر وتجينى
وحشتينى
ودلوقتى..أنا حيران
باشكى الوحدة للشطآن
وصوت الموج ووشوشته
وغنا عصفور وزقزقته
ودعا كروان
حزين حيران
فى آخر الليل يواسينى
وحشتينى ..وحشتينى ..وحشتينى