مواويل على الشط

يسعد مساك يا قمر
يسعد مساك
من كتر سهدى يا قمر
باسهر معاك
أنا قلبى عاشق يا قمر
عصفور جميل
يشبه فى حسنه يا قمر
منظر بهاك
.........................
قاعد فى ظل الشجر
ومعايا كام موال
وناى حزين بين صوابعى
قال اللى ما يتقال
صحت الطيور ع الشجر
نزلوا وقالولى
كفايه لحنك شجانا
سهرتنا وياك
..........................
قلت الحكاية طويلة
عصفور مدوخنى
طرت معاه فى السما
وبصوته أسعدنى
وجه لحد شواطئى
وعالرملة واعدنى
خان الوعود يا قمر
وببعده سهرنى
فرق ما بينا البعاد
وطار بعيد فى سماك
...................
قالت الطيور يا حزين
أوصف لنا شكله
ومنين نعرف طريقه؟
وفين مكان أهله؟
يمكن لأجل خاطرنا
يعود إليك تانى
وبعد طول الغياب
تلقى الحبيب وياك
....................
أنا قلت طيرى جميل.. وحسنه ما وصفشى
من حسنه غار الجميع ..وطبعه ما تقولشى
والسحر جوه عيونه.. يجذب ما يبعدشى
والرمش فوقهم سهام.. بتصيب ما تجرحشى
أما مكانه يا طير
بجوار جبل عالى
يطل على شط أحمر
وموجه مش عالى
وتحت موجه جناين
مرجان من الغالى
وبيته وسط الصفا
على بابه ياسمينه
عطر زهورها الجميلة
يدخل من الشباك
قالولى طيرك يا ولدى
صعب المنال بعيد
دور على حد تانى
أو روح لسيدى غريب
يمكن ببركة مقامه
تلقى الوصال قريب
وارجع لربك وادعى
تلقى الرضا جواك