صحيح النسيان نعمة .. لكن مش في كل الاحوال .. فيه حاجات الواحد ماينفعش ينساها .. ولازم يفضل يفكر نفسه بيها وبتأثيرها لحظة ماحصلت .. * حادثان عمري ما حانساهم في حياتي .. والاتنين حصلوا في توقيت قريب من بعضه جدا .. بعد ما اتذاع مسلسل حكاية ميزو ومسرحية الدخول بالملابس الرسمية اللي ظهروا للنور بينهم اقل من سنة ونص .. وكانوا عملين ناجحين .. قدموني للجمهور بشكل ماكنتش احلم بيه في فترة قصيرة جدا .. ولأني شخص غير قابل للنفخ ولابورم ولا الغرور بيلاقيله سكة معايا .. فما كنتش مستوعبة حجم النجاح اللي ربنا من علي بيه ده .. الحادثتين دول لم يصيباني بأي غرور .. لكن ملآني شعورا بالامتنان .. وخلوني فضلت اذكر نفسي باللحظات دي عشان ما انساش .. ولأن كان فيهم درس مايتنسيش .. * الحادثة الأولي .. كنت بعمل شعري بانتظام عند كوافير شهير اسمه غريب الله يرحمه بقي .. محل غريب ده ماكانش صالة فسيحة الستات بتترص فيها زي ما بنشوف في الأفلام .. لكن لأنه كان كبير قوي فكان فيه زي مربعات منفصلة تستوعب زبونتين فقط .. المهم .. كنا وقتها بنغسل شعرنا والكوافير يلفه علي رولات كله وبعدين يدخلنا تحت السشوار اللي هو حلة كبيرة كده بتضخ هوا سخن عشان الشعر ينشف وبيبقي صوت الهوا ده عالي جدا فالواحدة اللي قاعدة تحته ما بتسمعش حاجة من اللي بتحصل في المكان .. * دخلت ست جميلة كده شعرها طويل ومعدي اكتافها ومقصوص من قدام .. و مبلول .. فنازل علي وشها وبيسقط مية .. انا تحت البابور ده شايفاها لكن مش سامعة الولاد الكوافيرات بيقولولها ايه .. رغم إنه واضح من حركتهم انه بيحبوها جامد وبيحترموها جدا وبيحبوها قوي .. وهي بتعاملهم بطيبة وحنية جميلة .. * هو ده اللي لفت نظري .. ان الكائن اللي الناحية التانية ده كائن طيب .. لكن أنا مش من النوعية اللي الفضول يسيطر علي ويخليني ابحلق في الناس .. بعتبر دي قلة أدب .. فطبعا كنت ماسكة كتاب بقرأ فيه .. وكنت بختلس نظرة قصيرة فقط لأتعرف علي شريكتي الجديدة في الغرفة .. * كانوا الولاد بيحضروا عشان يلفوا شعرها المبلول بالرولات برضه .. لكن انا لمحت بجنب عيني أنها بتبعد الولاد اللي بيني وبينها عنها .. وبتدقق النظر لي .. حسيت بحرج ودفست عيني في الكتاب .. سألت الولد سؤال وهي باصالي فوطي عليها و همس وهو برضه بيبصلي .. لأ كدة بيتكلموا علي رسمي .. اتكسفت اكتر .. لقيتها بتزق الولاد وعايزة تقوم من عالكرسي وهما بيقاوموها عشان شعرها مبلول و حتاخد برد من تكييف المكان .. اجراء طبيعي منهم .. لكنها زقتهم برقة كده .. وجت ناحيتي .. وعشان تكلمني وانا دماغي تحت السشوار كان لازم توطي وتقرب بقها من ودني .. * نزلت علي ركبها عالأرض .. ومسكت إيدي اللي علي مسند الكرسي وابتدت تقوللي إنتي هايلة .. فنانة جميلة وموهوبة .. حاتبقي عظيمة .. انتي مكسب للفن لانك واضح أنك مثقفة ومش جاية من فراغ .. وكلام كتير من النوع ده .. * أنا بقي عرقي مرقي .. مكسوفة جدا وبقولها الله يخليكي يافندم .. ربنا يحفظك يا هانم .. كتر خير حضرتك .. وهي مستمرة بمنتهي الاخلاص والحب وووووو .. التواضع . * وأنا بقولها كده ابتديت ادقق في ملامحها .. وشها مش غريب علي .. الملامح دي حبيبة وقريبة لقلبي .. لكن مش قادرة أحدد بالضبط لأنها من غير أي ماكياج و شعرها مبلول وبيسقط مية .. إلي أن أدركت .. * يانهار ازرق .. ياليلة بيضة .. ياخبر مدهون لبن حليب .. يادي السعد يادي الهنا .. لقيت نفسي بنتش دماغي من تحت السشوار وانا بردد هذه العبارات .. وبنزل جنبها علي الأرض .. ده حضرتك؟؟ . يا أيامي اللي اتدهنت قشطة وملبن .. وفجأة لقيت نفسي ببوس ايدها وبحطها علي صدري وانا بهلوس بكلام كتير عن الامتنان والتقدير وعدم التصديق .. * الست دي كانت الفنانة العظيمة شادية . * الدرس ده علمني أن مافيش حاجة اسمها فنان كبير وفنان صغير .. لكن فيه حاجة اسمها فنان حقيقي .. وعلمني إن الإنسان بيكبر وقامته بتعلي لما يعترف ويقدر موهبة الآخر .. مهما يكن قدره ومركزه وعمره .. * نفس الواقعة اتكررت في احتفال كبير بنجاح مسلسل زينب والعرش .. المسلسل ده كان مليان نجوم كبيرة وعظيمة .. ولما الشركة المنتجة قررت تعمل الاحتفال بالنجاح عزمت كل الفنانين العظام دول .. وكل النجوم الكبيرة وقتها جم يجاملوا .. وعزمت الشركة انجح وجوه جديدة في الفترة دي احتفاء بموهبتهم أيضا .. فكنت واحدة م المعزومين .. جات قعدتي في ترابيزة طويلة مدروزة اساتذة .. وانا قاعدة ملهية باللي بشوفه وبحاول اسيطر علي تعبيرات وشي عشان الانبهار والهبل مايبانوش علي .. قدامي علي الناحية المقابلة .. برضه ست جميلة جدا لكن علي عكس الموجودات .. وشها يخلو من المساحيق .. انا ملهية بالاحتفال والكلمات اللي بتتقال لكن فيه حاجة غريبة .. حاساها علي وشي .. عينيها لا تفارق وشي لدرجة أني وأنا مش باصة عليها حاسة بعينيها .. وكل ما اتدور وعيني تيجي ف عينها تبتسملي ابتسامة جميلة ورقيقة كلها اعجاب .. وزهو .. مع الوقت ابتديت احس انها مش مبهورة باللي بيحصل حوالينا .. وقلت لنفسي .. الست دي موجودة هنا لأنها جزء من المجموعة فطبيعي انها لاتنبهر .. بس دي مركزة معايا قوي .. ما بترفعش عينيها عني .. قررت ابصلها شوية اكتر لأني حسيت انها عايزة تقوللي حاجة .. بصيتلها وابتسمت .. فوشها اتكسي ببشاشة غريبة .. ومالت لقدام ومدت ايديها .. ميلت أنا كمان لقدام واعطيتها ايديا .. حضنتهم بإيديها وابتدت تقول نفس الكلام .. انتي هايلة وحاتبقي عظيمة .. المرة دي كنت قادرة اسمعها رغم اني مش قادرة اتعرف علي ملامحها .. صوت حبيب للقلب جدا .. رخيم وكله أنوثة ورقة .. حرف السين ده مش غريب علي .. ونبرة الحنية دي مالية وداني من قبل كده .. فضلت ادقق فيها واحنا مستمرين في نفس الكلام .. هي بتمدح وانا بشكر بمنتهي الخجل .. وفجأة أدركت لأ ده كتير .. كتير قوي يارب .. * لتاني مرة أوطي علي إيد واحدة وابوسها .. لقيت نفسي بحضن إيديها جدا بين ايديا وبوطي ابوسها مش عرفانا بالجميل وإكبارا للإطراء بس .. لكن لعشقي الشديد لها .. ومن اللحظة دي بدأت بيننا صداقة وطيدة جدا .. لكنها انتهت للأسف بمأساة عورت قلبي تعويرة حاتفضل واجعاني لحد ما اموت .. * الست دي كانت .. سعاد حسني ...
