كل سنة وأنتم طيبون !

كل سنة أنتم طيبون , مش قادرة أصدق إن سنة عدت بالسرعة دي , واضح أن كل سنة بتعدي بسرعة أكتر من اللي قبلها , في الحقيقة نهاية سنة لا تعني نهاية شيء أو بداية شيء , لكن تعني استمرارية التعلم من تجارب الحياة , بالنسبالي أنا ففرحتي بالسنة الجديدة هتبتدي علشان جالي فرصة كبيرة أصلح أي حاجة غلط و أعيد الحاجة دي بس بطريقة صح , كان نفسي أكتب قائمة كبيرة بالإنجازات الكبيرة اللي
في الأول إن مدينة الإسكندرية حصلت علي أفضل مدينة عربية السنادي , وهي تستاهل , ويجب أن نشكر محافظ الاسكندرية الحالي والسابق , لأن أي تطور مابيحصلش في يوم وليلة , لكن علي مدار سنين , وطبعا نحيي سكانها أحسن ناس , اللي أكيد مساهمين في ده بإنهم يحافظوا علي نظافتها وعلي القوانين التي توضع للمصلحة العامة , من غير ما يعترضوا لأنها بس قوانين جايه من الحكومة , الإنجاز الثاني هو حصول مصر علي كأس الأمم الأفريقية في كرة القدم , وفخرنا بالمعلم اللي بيفرح مصر حسن شحاته , وأهمية تدريبه للاعبية مصر وقيادتهم بشكل سليم , الإنجاز الثالث كان في دورة الألعاب الأوليمبية التي لعبت في سنغافوره وحصل فريق مصر في كرة اليد للناشئين علي الميدالية الذهبية , ولنا هنا وقفة , ليه وإزاي مصر ماتحتفلش بشباب زي دور وتشجعهم علشان يحبوا هذا العمل وإن زي ما هم رفعوا اسم مصر بره احنا نحسسهم بتقديرنا لمجهودهم علشان نحافظ علي انتمائهم وحبهم لهذه اللعبة , حتي يستمروا في العطاء بنفس الإخلاص , الإنجاز الرابع والأخير تولي الوزير محمود محيي الدين منصب المدير التنفيذي للبنك الدولي , لأنها حاجة مشرفة جدا في الحقيقة , رغم أنه من عدة سنوات تولي دكتور ابراهيم شحاته منصب أعلي , وهو نائب رئيس البنك الدولي , الله يرحمه لم يذكر ذلك بالشكل اللائق واللي يستحقه , لأنه أسس العديد من المؤسسات الهامة خارج مصر , ولم يتم الإشارة إليها في وسائل الإعلام , خلصوا الانجازات اللي كنت أود أن تكون أكثر من ذلك بكثير , بس إن شاء الله السنة الجاية يبقوا أكتر , في حاجة حصلت تدينا أمل وتخلي الإنسان ماييئسش أبدا , وهي فوز الزمالك في كام ماتش , وده يبين إن مهما الواحد كان بئر عميقة وضلمه , إلا أنه لازم في آخر الضلمة نور بسيط ' أنا أصلا أهلاوية فدي طريقة مباركتي للزمالك '.
بما إني مالقتش إنجازات أخري أكمل بيها المقال , ففكرت أكمل المقال عن إزاي الواحد يحسن من حياته السنة الجاية , ويعمل لنفسه اسلوب حياة ' Life style زي مابيقولوا , يغير من حياته ويحسنها , أنا بقالي 3 سنين بقرأ في مجالات كتيرة حول موضوع ' علوم الطاقة الحيوية ', وبطبقه في حياتي , وحقيقي أنها بدلتها للأحسن , وأنا بدعوكم للقراءة عنها ومحاولة تطبيقها في حياتكم اليومية , لأنها مش سحر ولا شعوذة , لكنه علم في جميع الحضارات السابقة بداية من الحضارة الفرعونية والمكسيكية والصينية , كانت العلوم دي موجودة بغرض التنمية الفكرية والروحية , ولحفظ الصحة وتجنب الإصابة بالأمراض ورفع مستوي الطاقة الحيوية .
طيب ما هي الطاقة الحيوية؟
الطاقة الحيوية دي هي الطاقة الموجودة في الكون اللي حوالينا , وهي التي تبقي علي حيوية كل كائن حي , بداية من الإنسان وحتي الكائنات الحية كلها , كل الكائنات تستمد قوتها وحيويتها من الطاقة الحيوية الموجودة في الوجود , والتي جعلها الله سبحانه وتعالي سببا لبقاء الكائنات الحية علي قيد الحياة , وهناك مصادر أساسية للحصول علي الطاقة الحيوية , هي : الطاقة الحيوية الشمسية ودي - باين من اسمها - إننا بنحصل عليها من التعرض لضوء أو آشعة الشمس , والمصدر الثاني هو الطاقة الحيوية الهوائية , ودي بنحصل عليها من التنفس السليم , وناس كتير جدا بيتنفسوا بشكل خاطئ وهم مش عارفين , لأنهم بياخدو النفس ملئ الرئة , ويخرجوه , وده خطأ شائع , الشهيق لازم يوصل لغاية البطن ثم يحصل زفير وهذا له أساليب عديدة مختلفة , لازم النفس يملأ البطن الأول ثم يطلع للرئة وبعدين يطلع زفير .
وتالت مصدر أساسي هو الحيوية الأرضية , ودي بنحصل عليها من أكل النباتات التي تنمو في التربة , وأيضا نحصل عليها عن طريق بطن القدم , أن الواحد بيمشي حافي القدمين , لأن بطن القدم مقسمة إلي أجزاء , كل جزء فيها له صلة بمنطقة داخل الجسم , وممكن تحصل علي الطاقة الحيوية الأرضية من خلال الاستلقاء علي الأرض , أو في وضع السجود أو الركوع في الصلاه , والنوع ده من الطاقة الحيوية في الجسم له علاقه بالمقامات السبعة الموجودة في الجسم , أو ما يسمي بالشفرات السبع .
هناك فروع عديدة في مجال الطاقة الحيوية , منها فرع ' funksh way ز ومعناه ' أحساس التوازن والتناغم بيننا وبين البيئة التي نعيش فيها .
في الحضارات القديمة كانوا يهتمون بالمكان الذي ستبني فيه منازلهم ومعابدهم عن طريق اختيار اتجاهات محددة ومنظمة , حسب اتجاه الطاقة , حتي يصبحوا لديهم القدرة علي التفكير والتركيز بشكل أفضل , أنا عارفه إن الفكرة تبدو مجنونة لما تسمعها في دقيقة ونص , خصوصا الحديث عن شيء غير مرئي , وهي الطاقة , بس هيه حقيقي موجودة , والعالم المتحضر كله متجه نحو الرجوع إلي الطبيعة , لذلك , بمجرد إعادة ترتيب أساس منزلك ومكتبك ممكن يحصل تغيير كبير في حياتك , علي أي حال كنت ممن يعتقدون أن بيوتنا مليئة بالطاقة غير المرئية واللي بتأثر علينا , فإذا نظرت حولك ودخلت غرفة معيشة في منزلك قد تشعر براحة أكبر من غرفة أخري في المنزل , وحين تزور صديقا لك وتحس بعدم الراحة في منزله رغم انه صاحبك قوي , وفي نفس الوقت قد تذهب لمنزل واحد أول مرة تزوره وتحس براحة شديدة , وده معناه إن الطاقة تتدفق بحرية وسهولة حول وداخل جسمك ولذلك تحس براحة في المكان , وجايز أنك تصبح معافي من الأمراض بإذن الله , أما إذا اصبحت مسارات الطاقة مسدودة أو راكدة , زي ما بيقولوا , فهتحس بضيق وعصبية وسيؤثر ذلك علي صحتك .
هناك العديد من الأساليب التي يمكن اضافتها في بيتك لتحسين الطاقة , زي استخدام المرآة في أماكن معينة وقليلة وتقليل أي أسلاك كهربائية في غرفة نومك ووجود أنواع معينة من الأحجار الكريمة باختلاف خصائصها , لسحب الطاقة السلبية أو إضافة طاقة إيجابية إلي المكان , وده علم كبير له علاقة بإن كل حجر له صفات وخصائص معينة , أرجو أن أكون اتكلمت في موضوع مفيد ولو قرأت فيه هيساعدك علي تحسين اسلوب حياتك في سنة جديدة يارب تكون مليئة بالسعادة والصحة وراحة البال .