بالصور .. 45 دقيقة فوق نيل الأقصر !

زى ما عودناكم فى "سفارى" هناخدكم فى رحلة لمكان جديد، هيكون معانا الطيار أحمد عبود، وحانطلع فى رحلة لمدة 45 دقيقة بالمنطاد فوق مدينة الأقصر .. دلوقتى هنربط الحزام لأن الرحلة هتبدأ.
##
دلوقتى الساعة 5 و نص بعد العصر ورحلتنا على البالون هتكون أول رحلة ضمن الأربع رحلات اللي بيستغرقوا ساعتين بس حددتهم سلطات الطيران المدني، دلوقتى البالون بيرتفع فوق سطح الأرض و كل ما بيطلع بينا بنقدر نشوف المكان بشكل أوضح و المنظر من فوق قمة في الجمال .
##
البالون بدأ رحلته بينا من الجزء الشرقي للأقصر و بيمر دلوقتي على نهر النيل علشان يوصل للجزء الغربي من الأقصر و الجميل في المكان ده هو منظر النيل من فوق و هو بيقسم الأقصر لنصفين كل نصف مميز و مختلف عن التاني بحاجات كتير، النصف الشرقي هتلاقي الحياة بما فيها من بشر و مباني و زراعات ... والنصف الثاني عبارة عن آثار و مقابر فرعونية عالمين مختلفين تماما عن بعض .
##
##
ودلوقتى البالون بيعدي بينا من فوق النيل من النصف الشرقي إلى الغربي ، وفى المكان ده لاحظت كم كبير من البواخر و المراكب النيلية شكلها من فوق تحفة وكان الطيار أحمد عبود بيكلمنا عن أهم حاجة بتميز نيل الأقصر عن النيل في القاهرة هي إن ضفتى النيل في الأقصر مقاربة للون كهرمان.
وإحنا في البالون عدينا على جزر كتيرة رائعة حوالى 144 جزيرة مختلفة في الحجم في منها جزر كبيرة و أخرى صغيرة، أكبرهم جزيرة " النباتات " والجزيرة دي فيها أنوع نادرة جدا من الأشجار العملاقة و أشجار الفاكهة المختلفة.
##
##
##
و دلوقتي بعد ما انتقلنا للجزء الغربى لاقينا الدير البحري أو معبد الملكة حتشبسوت وهو معبد كبير جداً و المعبد ده زمان كان القصر الملكي أيام الملكة حتشبسوت و شكله المعماري من فوق يحسسك قد إيه الناس دي كانت عباقرة في التصميم المعماري .
##
##
و للأسف جولتنا قربت تنتهى و بدأ البالون يرجع تاني بعد ما قضينا 45 دقيقة من المتعة فوق سماء الأقصر لم تكلفنا سوى 400 للفرد الواحد، و نصيحة إللي بيفكر يجرب البالون في الأقصر ما يخدش معاه أطفال أقل من 6 سنوات ولا حتى ست حامل.
##
##
##
##
##
##
##
##
##
##