كوكب الارض و الشقة من حق الزوجة

- نحن معشر الرجال نمتاز بالطيبة بحكم الطبيعة فكثير من الآمور تمر أمامنا دون أن نتوقف أمامها للتحليل و الفهم ، و نظرية إشترى دماغك نظرية ذكورية خالصة ..و ذلك على خلاف النص التانى - اللهم ما إحفظنا - اللى من كتر إهتمامه بالتفاصيل يتحول إلى كائن ممل و زنان و بايخ بصورة مرعبة بس ماحدش يقول انى قلت كده ابوس ايديكم .
و الموضوع اللى يجب ان نحلله و نقف عنده ونقعد كمان هو مسلسل و سيناريو مرسوم بوضوح و دقة كانت الحلقة الاولى بتاعته قانون الشقة من حق الزوجة و الحلقة التانية قانون الخلع و الحلقة التالتة عربة السيدات فى المترو و الحلقة الرابعة تاكسى للسيدات و لسه مش هتكون الحلقة الاخيرة .
- و التنبؤ بما قد يحصل أمر مش صعب بعد كل الحلقات اللى فاتت دى ..فممكن نلاقى شركة سيدات فقط و فرن عيش سيدات و أتوبيس سيدات و عمارة سيدات و مدينة سيدات و و تليفزيون سيدات و موبيل سيدات و كومبيوتر سيدات و بلد سيدات و العالم كله يبقى سيدات و الرجالة يتحولون إلي ذكرى فى الروايات او يتلموا و يعملوا جميعة او يهاجروا بس المشكلة يروحوا فين بس .
- و فى كتاب اثار ضجة عنوانه الرجال من المريخ و السيدات من الزهرة يقول المؤلف ان كل واحد جه من الكوكب بتاعه و اتقابلوا فى الارض اللى واخدينها قانون جديد و اتجوزوا و عاشوا فيها و بما ان الشقة هى الارض و الشقة من حق الزوجة بقى على الرجالة انهم يرجعوا الى كوكبهم الاصلى كحل اخير , و عليه العوض بقى بعد ما فرش الارض و كلف و ايش الموتيال و سيراميك و نقاشة و ابقى سلم لى على القايمة و عفوا ايها القانون .
- و ده كان السبب وراء تسمية وكالة ناسا الفضائية باسمها لانها فى مهمة رسمية الهدف منها تنظيم رحلة المهاجرين الرجالة الى موطنهم الاصلى بعد استحالة العيشة معاهم و هى اسمها بيتكون من مقطعين ناس - و الالف رمز لادم يعنى ناس أدم يعنى الرجالة ، و ده طبعا نوع من انواع التمويه المقصود عشان ماحدش منهم اللهم يحفظنا ياخد باله - شغل امريكانى عالى – و تكتيك عشان مايخدوش مننا المريخ خاصة ان باقى المجرة لسه عليها كلام و فى الحالة دى احنا الرجالة هاندور على مجرة تانية و الامر مايسلمش و الاسعار مولعة و احنا لسه ملسوعين .
- فنصحية اخيرة عشان نعيش الايام القليلة الجاية لينا على الارض لما تكون راكب المترو و قاعد و اخر انبساط و تلاقى واحدة واقفة حتى لو عيلة عندها 4 سنين و نص قوم لها و لو سمعت حد صاحبك بيتكلم عن الظلم و ليه هما عندهم عربيتن سيدات و بيركبوا معانا ودعه و لو مش لاقى وظيفة و كل اللى بيشتغل ستات حتى انهم باصيين لكمصرى الاتوبيس و عايزين ياخدوا منه الشغلانة اسكت و اشترك فى كل جمعيات حقوق المرأة و دافع عنهم على قد ماتقدر اما موضوع الجواز ده تنساه خالص و ربنا يسهل نلاقى كوكب تانى نلاقى فى كائنات تانى غير الستات بتوع الزهرة....يمكن نلاقى فى زحل و لا و بلوتو و نكتب فى العقد المرة دى ان الكوكب مش من حق الزوجة .