هذا الشاعر كلامه .. " خفيف على المعدة " !

أنا الولد اللى خبى جوه فى كراسته الملبس واكتشف إن الزمان بيدوب السكر .. هكذا يصف نفسه مصطفى حسان ( 24 سنة ) ليسانس حقوق جامعة المنصورة ، وهو واحد من شعراء الأقاليم الشباب الذين لم يستسلموا للعزلة والبعد عن القاهرة وسعى دائما لأن يصل للناس بموهبته .
هو يعتبر أن الفيس بوك ألغى مسافات كثيرة وأن أشعاره وكلماته مقروءة من خلال " الأكونت " الخاص به ، وبخلاف ذلك يشارك مصطفى حسان فى الأمسيات الثقافية بالأوبرا ودور النشر ، وقد التقيناه مع عدد آخر من الشعراء الشباب فى الصالون الشهرى بالمجلس الأعلى للثقافة ، حيث قدم عددا من أشعاره التى تكشف عن بساطة فى التعبير وتلقائية فى المعنى .. كما تتسم كلماته – حسب وصفه - بأنها " خفيفة على المعدة " وكأنه يجلس معك ليحكى ببساطة فى موضوع ما بتلقائية وبدون تكلف ... وأول تجربة منشورة للشاعر الشاب هى ديوان "حدوتة الشاطر ما فيش " الذى يضم عددا من القصائد المتميزة ..
ففى قصيدة "من شخبطة على دكة تلميذ إبتدائى " يقول :
ما اعرفش اقولِكْ وارسمك ..
أنا أصلي عايش من زمان
تلميذ بليد بتعلِّمك ..
إنتي الصراحة المٌغريَه ..
وانتي الحقيقة المؤلمه ..
يا طلة النور م السما ..
ما اعرفش اقولك إنما ..
بيقولوا عنك في المدارس ..
ملهمه .
يا لخبطة آخر النهار ويا المسا ..
يا طعم شخبطة العيال في المدرسه ..
بتعلميني ان الخطايا
مش في مفهوم البشر ..
يا لون تفاصيل السهر ..
ساذج قوي شكل الكلام ..
إزاي هاقول عنك قمر ..
آخره يادوب ليلة تمام ؟!
قالوا زمان ..
الصمت حكمه ..
علمي قلبك بقي علشان ما بعرفش أقنعه ..
ماهو برضه يعني الليل بيسكت
واحنا دايماً نسمعه ..
بسمع في صمتك
زقزقة عصافير كتير بيسبّحوا ..
يا ريحة الماضي البعيد ..
أول ما قلبي بيفتحُه ..
قدام عيونك ليه بكون
تلميذ بليد دايماً عيونه بتفضحه ..
عايزاني أقول إنك ربيع
مفرود على وشوش البشر
والشمس تطلع كل يوم تستقبلك ؟!
تطبع على عيونك .. قبول ..
يا بصة النور م الضلام
ما اعرفش أقول ..
يمكن عشان الدنيا دايماً تبقى برد ..
وبيبقى نفسي أفرد مساحة تخش منها الشمس ليا .. ومش لحد ..
يمكن عشان طعم الكلام مش حلو
لما يكون بجد ..
ويملك مصطفى حسان سيرة ذاتية أدبية كبيرة بفضل الجوائز الكثيرة التى حصل عيها فى الشعر العامى وهى : المركز الأول على مستوى جامعات جمهورية مصر العربية عن قصيدة "زرعت الحلم في عيونك" للعام الجامعي 2004-2005 ، و المركز الثاني على مستوى جامعات جمهورية مصر العربية عن قصيدة "سلام سلِّم" للعام الجامعي 2005-2006 ، و المركز الثالث على مستوى الجمهورية في مسابقة المجلس القومي للشباب عن قصيدة "البحر مابيكلمش حد" لعام 2007 ، والمركز الثاني على مستوى الجمهورية في مسابقة موقع "بص وطل" الإبداعية عن قصيدة "سلام سلِّم" لعام 2008 ، وأخيرا المركز الرابع على مستوى الجمهورية في مسابقة اتحاد الكتاب عن مجموعة أعمال : "طلب إعادة نظر – عرق البدلة القديمة – من شخبطة على دكة تلميذ ابتدائي - حدوتة الشاطر.. مافيش" . ثم المركز الثاني على مستوى الجمهورية في مسابقة ساقية عبد المنعم الصاوي التشجيعية لشعر العامية عن قصائد (سيرة ذاتية و القهوجي ومبررات منطقية جداً) . كما شارك ويشارك فى الكثير من الأمسيات واللقاءات الثقافية .