لو عايز تركب ألة الزمن .. روح محمية وادي دجلة!

لو أنت من سكان القاهرة وزهقت من الزحمة والدوشة والصوت العالي ومن صوت الكلاكسات.. وبتحب الصحراء ومعندكش وقت تعمل سفاري.. ممكن تروح محمية وادي دجلة بالمعادي علشان تقضي يوم كامل في الصحراء.. وستشعر هناك بأنك رجعت آلاف السنين وكأنك داخل ألة الزمن ..
كتبت و صورت : أميره عبد المنعم
محمية وادي دجلة لها بابين واحد في المعادي، والتاني في طريق العين السخنة، وطولها حوالي 60 كيلومتراً وهي عبارة عن بيئة صحراوية تحتوي علي مجموعة كبيرة من الحيوانات منها أنواع الثدييات مثل الغزلان والتياتل ، والذئاب، والأرانب الجبلية، والخفاش أبو ذيل صغير وغيرها، وتم تسجيل 18 نوعاً من الزواحف تشمل السلاحف المصرية المهددة بالإنقراض بالإضافة إلي أنواع من الطيور المقيمة والمهاجرة، منهم 12 نوعاً من طيور الصحراء الشرقية، يعني كل ده هتستمع بيه، وتقدر تجيب كمان شواية معاك وتفطر هناك ، وكمان عجلة وألعاب، وخد أصحابك معاك علشان يبقي الجو حلو ، وممكن تاخد معاك خيمة يعني علشان لو حبيت ترتاح شوية.. أو تقلبوها غناء ومسابقات وتبقي فعلاً " خيمة رمضانية " لكن في الصحراء المرة دي ، وهات كاميرا معاك علشان تاخد صور عمرك ما هتتصورها في أي مكان تاني، يبقي كده قضيت يوم كامل في الصحراء من غير ما تسافر، وقضيت يوم خارج الزمن .
وتخيلوا .. كل ده مقابل رسم دخول للمحمية قيمته 3 جنيهات فقط للفرد.