قضية رأى عام .. الواد الصغير والرقاصة .. ومسخرة الترشح للرئاسة !

ايام قليلة تفصلنا عن اغلاق باب الترشح فى انتخابات الرئاسة .. سبقتها ايام رأينا فيها العجب سواء فيما يتعلق باللجنة التأسيسية للدستور أو فى شخوص بعض مرشحى الرئاسة الذين كان اخرهم الواد سعد الصغير الذى ظهر بالامس امام اللجنة بزفة بلدى ليقدم اوراق ترشحه مشفوعة باربعين الف توكيل .. يتكلف التوكيل الواحد منها ثلاثين جنيها .. والمعنى ان مليونا ومائتى الف جنيه انفقت او اهدرت او مزقت فى نزوة من نزوات الواد الصغير الذى لن يصبح رئيسا لمصر باى حال من الاحوال .. لكنه رمى مليون ومتين الف جنيه – على اقل تقدير – رماهم كما النقطة التى يرميها ثرى عربى سكران على رقاصة فى شارع الهرم ..
الواد الصغير ليس مخطئا ولا الومه .. لان هذه ثقافته وهذا هو مستوى تفكيره وتلك هى الطريقة التى اختارها للدعاية لنفسه .. لكنى اسال نفسى : ماالذى دفع الواد الصغير الى اعلان ترشحه على منصب رئيس مصر ؟
الحقيقة اننى لن احيرك فى التفكير لكنى سوف اطرح عليك عددا من الاحتمالات واترك لك حرية الاختيار ..
1- ممكن الواد الصغير يكون عمل كده لمجرد الدعاية لنفسه كمغنى شعبى .. فظهوره على الفضائيات مرشحا للرئاسة ربما يزيد من الطلب عليه فى الافراح .. وممكن ايضا يرفع سعره حتى يعوض المبلغ الذى انفقه على التوكيلات ؟!
2- ممكن الواد الصغير يكون وراه حد خصوصا من بتوع الخليج .. سخّنه علشان يعمل كده ونبقى مسخرة امام العالم ؟!
3- ممكن تكون هيبة منصب رئيس الجمهورية ضاعت بجد واحنا مش واخدين بالنا ؟!
4- ممكن الواد الصغير يكون عمل كده من نفسه وقرر يعمل عبيط على طريقة استاذه شعبان عبد الرحيم علشان شهرته توصل للمستوى العالمى ؟!
5- جايز تكون البت دينا الرقاصة طمعانة فعلا فى وزارة الخارجية علشان كده ضحكت على الواد الصغير و دفعته للترشح على اساس انهم مش حايخسروا حاجة ؟!
6- ممكن سلوك الجماعة السلفيين خصوصا اللى مامته طلعت امريكانية واللى عمل عملية تجميل فى مناخيره عمل رد فعل عكسى عند الواد الصغير وأثر على نفسيته وخلاه يتجنن ويعمل كده؟!
سعد الصغير
7- ممكن يكون عندك اسباب تانية تقدر تكتبها فى تعليقك .. لكن خلينى اسالك سؤال تانى : تفتكر ايه اللى ممكن يحصل لو الواد الصغير عملها ونجح فى الانتخابات ؟
- طبعا اول قرار حياخده هو اقالتى من منصبى وتحويلى للنيابة بتهمة الاساءة لرئيس الجمهورية
- وتانى قرار تغيير نسبة 50% عمال وفلاحين فى مجلسى الشعب والشورى الى 50% راقصين ولامؤاخذة .......
- اما تالت قرار فاعتقد حايكون نقل مقر الرئاسة من شارع العروبة الى شارع الهرم .. واعتقد ان ده حايخلى علاقاتنا العربية زى الفل خصوصا ان معظم اخوانا العرب حافظينه حانة حانة وزنقة زنقة وكباريه كبارية
على كل حال .. فالواد الصغير اصبح مرشحا محتملا للرقاصة .. قصدى للرئاسة .. يعنى من غير ماحد يزعل بقى زيه زى عمرو موسى وابو الفتوح وابو اسماعيل والعوا وحمدين والشاطر وشفيق .. ولسه !!
محمد عبد الله