"منحاز" ايوة.. "رقاص" لاءه

من حقك بعد 25 يناير ان تنحاز وتعلن انحيازك لاى موقف أو رأى أو فئة.. فالانحياز يا صديقى هو حق اصيل تكفله لك ديمقراطيتنا الجديدة...بس على شرط.. من الان فصاعد بردو اتعود على دفع التكلفة عشان الثورة هتقضى على الضحك على "الذقون" وركوب "العقول"
"الرقص" ممنوع..بعد ان قضت الثورة على النظام بعون الله : بكرة تفوق و تلم شوية الراقصين اللى جريو بسرعة وغيروا البدل والفرقة كمان.بس على مين يا معلم .. التسجيلات والورق والصوت والصورة سابإنكوا فى كل مكان
افرض مثلا.. انك كنت قبل الثورة من خدامين حملة الانتخابات الرئاسية.. وكافؤك يا حبيب بابا على مجهودك وافكارك اللى عرضتها للبيع بدون مقابل .. ربنا وفقك
وعرفت كمان تاكل دماغهم وتقنعهم ان الخير كل الخير فى انك تفضل تخدمهم "فول تايم" بدل "بارت تايم" اصل ايه خدمتهم فى الوقت ده كانت بواسطة ومش اى واسطة
وافرض برده انك نجحت ويا بركة دعا الوالدين لبسوا البوصة بقت "عروسة" وبالخيوط من فوق "الليل الليل الليل" يا ميمون شوية معارض وشوية تاييد من خلال كرسى ميديا يعنى لا مؤاخذة صحافة وتليفزيون وكدة او كرسى مجلس او كرسى جوزا..
نصحيحة مني الحق يا خويا فى اليومين المفترجين دول ادعى ربنا يسترك ولا يفضحاكش زى ما فضح ولى نعمتك واسيادك الصغيرين
وممكن تكون من اللى كانوا بالليل والنهار بيبوسوا ايد الست .."الهانم" يعنى بعد ما البيه غصب عليك علشان ترجع تانى تتجعص على كرسى فى منصب كبير
بعد ما كنت "مزغود" "مرفوض" "كتكوت مبلول" من غير ريش ..... وبعد الخطب والكلمات فزت بالمليون وبقيت " الميمون " هأهأء سعيدة يا بدلة جديدة..
وقعدت على الكرسى انت وهو وانجعصتوا مستعدين .. لغسيل المخ .. والكبدة .. و الطحال عشان الباشا الصغير يركب .. ان شالله يحط جزمته على راسكو..
وفجأة .. وبقدرة قادر.. اترمت البدلة ام ترتر وذهب وياقوت والماظ ولبسنا البدلة البلدى ..ام رقعة من على المؤخرة وكم مهلهل ... و"اديلوا ادى" هاتك يا رقص.. شوية ناصرية من ايام الجامعة .. على حبة اشتراكية ثورية وشوية اخوان على حبة اصول سلفية.. والدوبلير بتاع الثوار على الكتف اليمين .. و دوبلير الاخوان على الكتف الشمال..
وهيصة وزمبليطة فى المحل.. حبة فوق .. حبة تحت ...من الهانم لام بروكة .. ومن مصر اتولدت من جديد يوم عيد ميلادك يا ريس لاعدموا السفاح ومن جمال دة صاحبى والتباهى فى المؤتمرات الكبيرة بالسلام عليه هو ومامته ومراته للبحث عن ثوراته المنهوبة فى لندن فى تحقيقات استقصائية انما ايه..
ابشروا يا راقصى الانظمة نجحت الثورة فى القضاء على اسيادكم ... وما انتم الا اراجوزات الانظمة لن تجدوا لانفسكم مكانا قريبا
ومع الأسف مع الالم... اعمالكم واقوالكم مسموعة مرئية ومقروئة .. ويا ريتها كانت فى الذاكرة البعيدة.. كل الذكريات لسة سخنة ومتخزنة فى ذاكرة اول امبارح.
5 أغسطس 2011
fb:comments title=""منحاز" ايوة.. "رقاص" لاءه" href="http://www.amwalalghad.com/index.php?option=com_content&view=article&id=31481:منحاز-ايوة-رقاص-لاءه&catid=1153:دينا-عبد-الفتاح" num_posts="1" width="700" publish_feed="true" colorscheme="light"