جوزك على ما تعوديه.. مش لازم كل خروجة بخناقة

بيكون فى مناسبات اجتماعية وارتباطات عائلية وعزومات مهمة، ‏طبعًا بيكون ليها معاد وغالبًا ما بتحصل خناقة قبل النزول للعزومات دى.
طبعًا الخناقة بتبقى غالبًا إن الزوجة أخرت الزوج وهيروحوا متأخرين على المعاد.‏
أنا متفهمة جدًا موقف الزوج وإنه دايمًا شايف نفسه بيروح متأخر عن المعاد بس للأسف فى حالات طارئة تستدعى التأخير.
يعنى لو بنحضر مأكولات للعزومة، الزوجة راجعة متأخر من الشغل ومش لاحقة تخلص، بتلبس ولازم تلبس الولاد وتتأكد ‏من تفاصيلهم.
كل ده بياخد وقت وممكن يأخرها على المعاد. وفى الآخر التأخير غالبًا ما بيكون بسيطً وهو مش معاد فى الكونجرس دى ‏عزومة.
طبعًا الموقف مختلف ما بين الزوج والزوجة لأن الزوجة لازم تراجع على كل التفاصيل الخاصة بيها وبأولادها وحتى بزوجها‏، اللى ممكن من كتر اهتمامه بالمعاد ينسى حاجات مهمة خاصة بيه جاكت، أدوية، الحاجات اللى مفروض يخدوها معاهم ‏العزومة يعنى أشياء من هذا القبيل.‏
تقديسه لفكرة المعاد بتكون مهمة وممكن تبقى على حسابه شخصيًا، طبعا ده مفهموم جدًا.
بس من الناحية التانية الزوجة فعلا مسكينة ومش دايمًا بتلحق، ومن هنا تبدأ الخناقة اللى غالبًا بتكون قبل كل خروجة.
فياريت أيها الزوج العزيز أن تتحلى شوية بالصبر وممكن تقدم يد المساعدة علشان تنزلوا فى المعاد وتلحقوا العزومة فى ‏الوقت المحدد وتبقى عزومة بدون خناقة.