رمضان كئيب يا متجوزين

رمضان كريم يا سناااااجل.. إنما رمضان بتاع المتجوزين مش «كريم» نهائى على فكرة! تهنئة رمضان النسخة المتجوزينى لازم تتبع ب«سيد» إنما مش كريم خالص والنعمة ما كريم! الطعامة بقى كلها أن أول ما الفيس بوكاويين السناجل يبتدوا فى العد التنازلى لرمضان وتشيير كولكشن من صور الفوانيس فبيكون فى المقابل جمهور الزوجات بيحتضر من الرعب بسبب أن رمضان بالنسبة لهم شهر الخناقات!
النهاردة ولفترة غير محدودة فقط على صفحات «الوطن» هننشر دليل المتجوزين لخناقات رمضان! أول خناقة معانا هى الخناقة «البيست سيلر»، خناقة «هنفطر فين أول يوم رمضان؟» الزوجة عايزة تفطر عند أهلها، والجميل عايز يفطر عند أهله.. ويبتدى بقى البوز الرمضانى المتين اللى بينتهى أن الزوج بيروح يفطر عند أهلها بس طبعاً مبيروحش لوحده، بياخد معاه بوزة وهزة رجلة وكشة حواجبه وأمه طبعاً بتبقى معاه عالموبايل! طبعاً المدام بترجع تطلع عين العسول «إنت كنت قالب وشك»، «ماما جابتلك زلابية وإنت قولتلها مبتحبهاش بالرغم إن رمضان اللى قبل قبل اللى فات كلت زلابية عند مراة ابن خالة مراة عمك وكمان قولتلها -واااو- الزلابية تحفه» «مضحكتش ليه معانا وإحنا بنتفرج على رامز قرش البحر» «يعنى سيبت قراصيتين من اللى فى الخوشاف وكلت المشمشية كلها بالرغم إنك فى الأساس بتحب القراصية بس قصدك إيه بجد!» وهكذا! طبعاً هو يستاهل هو فيه حد برضو ياكل قراصيتين بس! والنبى يستاهل».
ندخل عالخناقة التانية، الزوج بيقرر أن «تانى يوم رمضان هنفطر عند ماما» اليوم ده غالباً بيبقى بروفة لأهوال يوم القيامة! الزوج بيغلط غلطة عمره لأنه بيرجع بدرى من الشغل فبيقابل بقى «يعنى جيت بدرى النهاردة وإمبارح وإحنا رايحين لماما جيتلى والمغرب بيقول الله أكبر!»، «يعنى ضحكت النهاردة على حلقة رامز يعنى!» «غريبة! كلت زلابية النهاردة يعنى! مش دية اللى مبتحبهاش!» المهم بيروحوا وغالباً الزوجة مبتاكلش كويس عالفطار كنوع من أنواع أنها تردله اللى هو عمله فبرضو مبتضحكش معاهم على رامز وتهز رجليها وتكش حواجبها وطبعاً مبتكملش قمر الدين برضو!
تالت يوم رمضان غالباً مبيفطروش، لأن المدام مقموصة! رابع يوم عند خالته، خامس يوم خالتها.. سادس يوم عمتها سابع يوم عمته وهكذا يوم المدام تتخانق ويوم البيه يتخانق!
الجدول الرمضانى العكنانى للمتجوزين لازم يتحرق الحقيقة! ما كل واحد يتنيل يفطر عند أهله هو لازم اللزقة يعني! السؤال هنا بقى إحنا ليه كمتجوزين لازم نلزق فوق دماغ بعض طول رمضان طب ما الموضوع أبسط من كده! إنتوا ممكن تخلصوا من خناقة أول يوم رمضان وهو يروح لأهله وإنت تروحى لأهلك، هتعيشولى فى دور الترابط الأسرى والهتش ده! هقولكم أكيد النكد أحقر بكتير من إنكوا تفكوا لزق الترابط فى اليوم ده وتحلوا عن سما بعض! وهكذا برضو فى باقى عزومات رمضان اللى عايز يروح يروح مش عايز ميروحش.. أما خناقات الزوج مع الزوجة عن أن الأكل بارد وفين الشوربة والكلام ده، فوالنبى «نفّضيله» ملهاش لازمة إنك تنكدى عليه، لإنك بتنكدى على نفسك قبليه، فوالنبى روقى وفكك وانبسطى.
أذكركم وأذكر نفسى معاكوا، أبوس إيدكوا وإيديا فككوا من خناقة أول يوم.. فككوا من مين كل بسبوسة ومين مكلش.. مين ضحك على رامز ومين مضحكش.. فككوا أو جددوا فى خناقات أحلى من كدة بكتير والله لأ وبتبقى جديدة وستايل! كونى ستايل ومتجددة فى خناقاتك يا مدام.
يلّا كل سنة وإنتوا نكديين يا متجوزين! كانت معكم كبيرة النكديين ونجمة خناقة أول يوم رمضان وبرنسيسة خناقة إنت مكلتش غير قراصيتين ليه: بسمة السباعى
أوروڤوار.