جوزك على ما تعوديه.. حصل ألف خير

مش كل أزمة أو مشكلة بسيطة لازم فيها حوار أو خصام وخناق.. لا على فكرة هى ممكن تعدّى من غير ما نقف عندها أساسًا، أيْوَه يا جماعة.
أنا مش بقول إننا نشيل زعلنا ومانتكلمش فيه، أنا بقول إن مش أى مشكلة بسيطة أحوّلها لحوار كبير ويبقى لازم ناخد فيها كل خطوات الخناقة واعتذارات وبوز، فى نوعية من الموضوعات عدم ذكرها أو الكلام فيها بيكون أفضل وبيجنب الدخول فى مشاكل أكبر، وفى نوعية أخرى ممكن تخلص بحصل ألف خير..وفّروا مجهودكم وصحتكم للخناقات اللى تستاهل مش كل حاجة حوار ومشكلة..
وفى حاجات المفروض إننا اتعلمناها خلاص، يعنى مش أول لما يدخل من الشغل نقول له المشاكل، ومن ناحية أخرى مش كل كلام السّت بيتاخد على محمل الجد، احنا كستات بنحب نتكلم كتير وغالبًا بيبقى كلام مش مترتب ولا محسوب.
فإزى.. ما أنا بكبّر دماغى فى كتير من تصرفاتك اللى ياما قلت إنها تتضايقنى.. أنت كمان متحاسبنيش على كلام بقوله وقت زعل.
الكلام ده بيكون نتيجة تراكمات وتعب وعصبية وغالبًا ما بيخلص بكلمة حلوة من أى حد.
ثقافة الاحتواء مهمة جدًا وبتشعر اللى قدامك إنك فعلاً بتحبه وممكن تعدى له الخطأ، وإننا مش فى مباراة كرة قدم وفى انتظار إعلان النتيجة..
مش مهم خالص مين الغلطان، مش مهم مين اللى يعتذر، المهم إننا نفهم اللى بيضايقنا ونحاول نخففه.
وبعدين؛ فى ظروف محيطة بالموضوع ممكن تؤثر جدًا على أسلوب وطريقة الانفعال، فا ياريت نلتمس لبعض الأسباب ونتفهم الظروف.
وحصل ألف خير، ده مش معناها إنكم متتخنقوش أبدًا لا سمح الله بس وفّروا الطاقة على الخناقات اللى تستاهل ويكون فيها وجع جامد ويستحق.
وربنا يبعد عننا وعنكم شر الخناقات الكبيرة بتاعة الوجع لأنها ممكن تؤدى إلى إصابات وكدمات وحاجات كتيرة ممكن تحتاج لأكثر من 21 يوم علاج وكلامى هنا للزوج خد بالك وأمشى جنب الحيط.