جوزك على ما تعوديه.. قول بحبك

هو مينفعش الزوج يقول لامرأته إنه بيحبها؟ هل ده تعدى من المحرمات؟ ليه بيبطل يقول لها إنه بيحبها وأنها أهم واحدة عنده فى ‏الدنيا (بعد السّت الوالدة طبعًا)؟ ‏
ليه الحياة بتقلب جد أوى بعد الجواز؟ ليه الغزَل والدلع بينتهى بعد الجواز؟ ‏
الراجل هو مصدر الكلام الحلو فى البيت، لو السّت مسمعتش الكلام الحلو منه هتسمعه من مين؟
إيه اللى هيحصل لما يقول لها إنه بيحبها جدًا وأنها حب عمره!؟ والحياه كانت حتبقى صعبه من غيرها؟.
على فكرة السّتات بيحبوا أوى يحسوا إنهم متقدرين ومحبوبين جدًا من أزواجهم، وده بيخليهم يعملوا المستحيل لإسعاد أزواجهم، ‏يعنى فى الآخر الكلام ده حيأثر عليك إيجابيًا. ‏
الفكرة أننا لازم نركز أن الجواز ده بداية مشوار الحب مش نهايته وأن صيانة العلاقة والحفاظ عليها بإظهار المشاعر بيساعد على ‏عدم جفافها.
والزوج الواعى هو اللى دايمًا يبقى حريص على تقبيل زوجته واحتوائها بالكلمات الجميلة والمشاعر الرومانسية اللى بتحبها ‏كل ست.
أنا مش بقول إنك تدخل عليها كل يوم بورد ولا تسيب شغلك وتفضل معاها كل يوم. ‏
بس مفيش مانع إنك لو كل كام يوم تقول لها إنك بتحبها وإنك شايفها أحلى ست فى الدنيا حتى ولو هى مش كده. السّتات بيحبوا ‏أوى كلمات الغزَل والحب من أزواجهم.. قول ورايا: «أنا بحبك، مقدرش أعيش من غيرك، بحبك أوى، أنتى أحلى واحده فى حياتى».‏
شفت سهلة إزاى!؟ حبّوا بعض وبلاش تضيّعوا اللحظات الحلوة فى الزعل والخناق.