دلوقتى بقت الموضة أن الولد عشان يعبر لحبيبته عن حبه لها بيعمل حاجتين أول حاجة أن يكون رومانسى متفائل ومقبل على الحياة فيتفق مع الأصدقاء المشتركين لهم وياخد إللى بيحبها فى مكان شاعرى بحر ورمل وسما وطبعا الوجه الحسن هو هيعوز إيه أكتر من كده ويعملها proposal party يعنى هيعمل زى شجيع السيما ويتقدم لها أدام كل الناس أمال أصاحبه لزمتهم إيه ما هم إللى هايشيلو اليافطة المكتوب عليها بالإنجليزى will u marry me? I love u my darling. ويفضل هو راكع على رجله ويقولها (أنا بحبك وعايز أكمل كل حياتى معك، ونفسى تكونى أم عيالى) وكلام كتير من النوع ده.. واصحابه يا حرام لسه شايلين اليفط وعايزينه ينجز ويلخص لأن مافيش غير حل من اتنين يا أما هيجلهم ضربة شمس يا أما هيتكسحوا من كتر الوقفة واليفط تقع على دماغهم.. أما الحاجة التانية هى أن الولد يكون كاره الحياة أصلا بس برده رومانسى حتى آخر نفس زى أخينا ده إللى شنق نفسه من على كوبرى قصر النيل أو التانى إللى لحقوه قبل ما يرمى نفسه من على كوبرى عباس السؤال هنا يطرح نفسه هو لسه فيه ناس بتموت من الحب؟ وتنتحر عشان إللى بتحبه؟ ولا لأن الناس من كتر العيشة الكويسة والحياة الرغدة حصلها اكتفاء وملل فتقوم مجربة الانتحار أهو تجديد برضه...