احترس من الرغاية

المصريات أنواع: الرغاية والحشرية والكذابة والشعنونة وخلينا فى الرغاية علشان الأصناف التانية صعبة شوية، فالرغاية أول ما تدخل على جارتها، ومن غير إحم ولا دستور تشتغل على طول: صباح الخير ها عاملين إيه فى الحر ده، جوزك فين نايم يللا فى داهية!
آه صح نسيت أقولك مش سعيد جوزى تعبان من إمبارح بعيد عنك ضرب طبق كشرى فى الشارع، أصله بيموت فى الرمرمة زى أمه.. يا ريت كانت روحه طلعت.. قال قوليلى صح: أم إبراهيم سَرّقت فوزية الخياطة فى جمعية رمضان؟!
لأ معندهاش حق دى هى اللى حرامية هى وبناتها، دى مرة جات عندى سرقت 20 جنيه كان سعيد سايبها لى فوق التليفزيون، بس أنا بلعت الموضوع فى بطنى ومتكلمتش، يللا إن شاء الله ربنا يوعدها بسواق توك توك أعمى يخلصنا منها، المهم هو أنا كنت جايه علشان إيه؟ آه صح.. عندك والنبى شوية سكر أحسن سعيد نسى يجيب التموين كالعادة، نسيت أقولك قبل ما أمشى: إمبارح وأنا بشرب الشوربة كانت سخنة مولعة يا أختى لهلبت لسانى ومن ساعتها مش عارفة اتكلم زى الأول.
يللا فى داهية!