محاكمة مبارك في ميدان التحرير: عيد ميلاد "أبو الفساد"

يللا حالا بالا.. حيوا «أبو الفساد»
الريس عنده أصل.. مهربش بره مصر
يعتبرون محاكمته نكرانا للجميل والعشرة لا تهون إلا علي أولاد الحرام رافعين شعار الريس عنده أصل ماهربش بره مصر.
والمعارضون: أرحمنا وارجع بقي.. مين اللي هيغير اسم 620 ألف مشروع ومدرسة باسم سعادتك؟ يا ريس أرجع أنا خايف رغيف العيش يكبر وأنا ناوي أعمل «دايت»!.
ياريس أرجع وإللي أتفرم يتصلح وأحتفالا بعيد ميلاده: يللا حالا بالا بالا حيوا أبوالفساد هيكون يوم إعدامه الليلة فليسقط أبوالفساد
. 48 شخصا فقط هم من محبي صفحة تأييد الرئيس المخلوع والتي وضعوا عليها صورة الرئيس السابق معتبرين أن هذه الصفحة مخصصة للالتفات نحو شخص الرئيس احتراما له وحرصا علي مصلحة مصر وأمنها وامن شعبها.
وجاءت مبررات من أنضم إلي هذه الصفحة أن محاكمة الرئيس هي نكران للجميل طوال ال30 عاما الماضية.
كتبت غادة جمال: إن الرئيس مبارك لم يضرنا بشيء طوال ال30 عاما الماضية، والتي وصفتها بأنها أعوام سلام بفضل الحنكة السياسية وقوة الجيش المصري، وأن ما نفعله به الآن هو نكران للجميل وأنه قائد عظيم وهو من قام بإعادة بناء البلد اقتصاديا وسياحيا وإعادة بناء الجيش بعد خسائر عام 1973 وأنه من استرد أرض طابا دون طلقه نار واحدة. وهو من أعاد التنمية في الفترة ما بين 1975 إلي أن أتت الأزمة الاقتصادية مجددا وأضرت بالجميع.
وقام بإنشاء الكليات العسكرية والحربية والبحرية ومترو الأنفاق والكباري وإعادة إصلاح الطرق ومشروعات مبارك للإسكان.
والحفاظ علي حصة مصر من مياه النيل رغم كل الصراعات
فمبارك رجل صنع في حرب أكتوبر إنجازا جعل الرئيس السادات يقول عنه إنه رجل تخشي منه إسرائيل ووصفته بأنه الرئيس الوحيد الذي لا يأخذ إملاءات ولا أوامر من الخارج واختتمت كلامها قائله (لك الله يا مبارك والله أسال أن يشفيك ويشفي عقول الناس).
فادي يوسف يقول أنه لم ير طوال عمرة إلا الرئيس فبينهم عشرة مشيرا إلي أن ضد محاكمة رجل في الثالثه والثمانين من عمرة فالعشرة لا تهون إلا علي أولاد الحرام.
وفي صفحة أخري لمؤيدي الرئيس تحمل عنوان «أنظروا ماذا فعلتم بعزيز مصر» حيث حملت الصفحة عدة صور للرئيس مبارك، وهو في فترة النقاهة بالبيجاما وهو بالزي العسكري وصورة أخري تقول حسني مبارك للأبد وفي هذه الصفحة انضم 120 شخصا حيث حملت الصفحة شاركنا إن كنت تحب مصر.
والريس عنده أصل ماهربش بره مصر وشيلوا اسمة من كل مصر بس حتشيلوا اسمة من قلوبنا إزاي وأخر كتب ولا عزاء لقلة الأصل.
وأخر كتب أنا مش فاهم دي مش طبيعة الشعب المصري الاصيل التمثيل والانتقام الراجل ده علي الاقل بلاش نهينه مايستحقش كده.
إحنا السبب في إهانته بصمتنا
أحمد أمير كتب ياناس يامسلمين هتاخدوا إيه من التنكيل والتمثيل بالرئيس السابق أنا مش قادر أفهم انتوا ليه مش بتسمعوا الرأي الآخر وبنهاجمه وتشتمه أنت معارض أنت حر وإحنا مؤيدين فإحنا أحرار وبعدين إحنا مش بننكر أن كان في أخطاء وظلم وفساد بس الرئيس السابق مانقدرش ننكر رصيده العسكري وبعدين سؤال واحد لكل من يهاجم ويشجب وتتملكه رغبة الانتقام... ماذا لو تمسك الرئيس السابق محمد حسني مبارك بالحكم كغيره من الرؤساء أمثال القذافي وغيره.
شعار البعض علي الفيس كان يا تحرير يا تحرير الريس طول عمره كبير.
أبو محمد كتب شكرا سيادة الرئيس بدأت بحبك لمصر وأنهيت حياتك علي حب مصر بدأت بالحرب والنصر والتحرير لأخر شبر من أرض مصر وتنحيت في النهاية من خوفك من دمارها ومن الفتن الغربية وحقنا لدم المصريين ولم تفعل كصالح ولا القذافي ولا بشار فلك منا كل تقدير وإعزاز ولك منا كل الاحترام وسنظل بك فخورين مهما حيينا وسنذكرك لأبنائنا بكل خير مهما حرفوا كتب التاريخ.
محمد كتب يقول هو كل إلي يقول كلمة حق يبقي من فلول الحزب الوطني مش مهم فول ولا طعمية أنا بحبك يااااااااااااريس.
شاهنده محمود كتبت: متمنيه عودة الرئيس مرة أخري... الله حماك ومعاك تخطي وإحنا وراك نحن نحبك جميعا ونتمني لك شفاك ومؤيدين مصر في حبها نريد تكريمك وطمعنا تكون لنا رئيسا مرة أخري يأتي السلام مرة أخري يعيد الأمان مرة أخري تبتسم شمس مصر تاني ترجع لينا الأماني نفسي ترجع ضحكتي وربنا يحقق لي أمنيتي إذا كنت قريب لنا في الله معاك ونتمني ب 80 مليون صوت لحد ما موت ربنا يصبرك وتعود صحتك وترجع ضحكتنا وضحكتك.
علي الجانب الآخر كانت هناك تعليقات رفعها شباب الفيس بوك سخرية من مؤيدي مبارك منها ارجع يا ريس.. قبل العيد عشان نعرف نقول ''عيد مبارك''!.
ارجع يا ريس.. مش لاقين اسم لمحطة ''رمسيس'' في المترو!.
ارجع يا ريس.. تقريبًا نسيت نور الصالون في القصر مفتوح!.
ارجع يا ريس.. شكلك هيبقي وحش أمام السادات وعبد الناصر لما يسألوك مشيت إزاي؟
ارجع يا ريس.. وحشنا ابنك جمال!.
ارجع يا ريس.. عشان ننزل التحرير تاني ونأكل كنتاكي!.
ارجع يا ريس.. جيراننا بقوا يطبخوا ع الفحم.. أصلنا وقفنا تصدير الغاز!.
ارجع يا ريس.. وإللي اتفرم يتصلح!.
ارجع ياريس... شارع صلاح سالم بقالوا كتير ما بيوقفش!.
ارجع يا ريس.. دكاترة الضغط والسكر والقلب مش لاقيين شغل!.
ارجع يا ريس.. عشان خاطر تامر حسني أو تامر أمين!.
ارجع يا ريس.. بقينا بنتكلم في السياسة براحتنا ومحدش بيمنعنا!.
ارجع يا ريس.. شكلنا هنبقي من الدول المتقدمة!.
ارحمنا وارجع بقي.. مين إللي هيغير اسم 620 ألف مشروع ومدرسة باسم سعادتك؟
يا ريس ارجع أنا خايف رغيف العيش يكبر وأنا ناوي أعمل ''دايت''!.
ارجع بجد، دلوقتي لما مبيعجبناش وزير بيتغير، المسئولون اتبهدلوا من بعدك!.
ارجع يا ريس، الإخوان بقوا بيطلعوا في التليفزيون الحكومي.
علي جانب آخر دعت حركه 6 أبريل بالبحيرة إلي الاحتفال بعيد ميلاد الرئيس المخلوع حسني مبارك الثالث والثمانين تحت شعار « عيد ميلاد أبو الفساد» وقررت الحركة الاستعداد ببرنامج يوم الأربعاء القادم الموافق 4 من مايو أمام مقر مبني أمن الدولة بدمنهور . وأكد أعضاء 6 ابريل إن الاحتفالية ستتضمن عرضا لصور تجسد مظاهر الفقر والاستبداد الذي تحمله المصريون طوال 30 عاما وعرض لفيلم تسجيلي عن قضايا الفساد التي تم الكشف عنها وقضايا الخصخصة وبيع شركات القطاع العام إلي رجال الحزب الوطني فيما أعلن مجموعه من نشطاء الفيس بوك دعوات للاحتفال بعيد ميلاد الرئيس السابق تحت اسم «عيد ميلاد أبو الفساد» وفي عيد ميلاد مبارك المخلوع هنقول: يللا حالا بالا بالا حيوا أبو الفساد.
فيما كتب أحد النشطاء تعليقا علي الدعوة يللا حالا بالا بالا حيوا أبو الفساد هيكون يوم إعدامه الليلة فليسقط أبو الفساد .. وكتب آخر كان يوم اسود يوم ما جيت وكان يوم ابيض يوم ما مشيت.