البؤساء

إحنا مش بؤساء على فكرة.. والله ما بؤساء
كلنا بناكل ونشرب ونلبس ونتعلم ونشتغل ونتجوز ونخلف وعيالنا بياكلوا ويشربوا ويلبسوا ويتعلموا ويشتغلوا ويتجوزوا ويخلفوا.
فى الإجازات بنروح كارفور وهايبر ومول العرب وسوق الجمعة والحكر والعتبة والقرافة فى البساتين وعند إخواتنا وحمواتنا وبيت العيلة فى شم النسيم بنروح الغردقة وشرم الشيخ ومنشية القناطر وجنينة الحيوان والفسطاط وبنركب مراجيح عند سيدى العريان فى الصيف بنروح الساحل وإسكندرية وجمصة وراس البر والعين السخنة وفايد وبورتو سخنة ومرسى مطروح بنروح سينما وملاهى وأفراح وأعياد ميلاد وطهور وفلانتاين وعيد فطر وأضحى وميلاد وقيامة وغطاس وعيد الأم ست الحبايب يا حبية.
الولاد بيشتروا نضارات شمس، ويحلقوا حلقة الديك، ويضربوا جينزات ويجيبوا كوتشيات بالقسط من عند أبوهبة ملك الربا البنات بيجيبوا ميك أب ويعملوا شعرهم عند الكوافير، وفيه قسم خاص للمحجبات، وطرح سبانش، وبيعملوا أسانسات عند حمادة بتاع العطور الإزازة بعشة جنيه، اللى كاتب يافطة إن العطور للزوج فقط، وغير ذلك حرام شرعا.
بنحب ونتحب ونغش ونتغش وننتقم ونسامح ونرتبط ونسيب بنحزن على اللى ب يروح، خصوصا لو ضحية، ونفرح بأقل حاجة، ونشجع فريق محلى وفريق دولى وننفعل مع أبطال فى أفلام ومسلسلات عربى وتركى وأمريكى وهندى ومكسيكى بنعبر عن رأينا فى التليفزيون والراديو والفيس بوك وتويتر والشوارع والحوارى والميادين بنمر بصعوبات مالية من أول اللى مزنوق فى ميت مليون جنيه، مرورا بإللى مزنوق فى ميت ألف، لحد إللى مزنوق فى ميت جنيه يكمل بيها الشهر عندنا أزمات مع الدولة كلنا أزمات مع الدولة من أكبر مؤيد لأشرس معارض فيه ناس عايشين أحسن من ناس بكتير، طبعا فيه ناس عايشين أحسن من ناس بكتير، ودون وجه حق، طبعا فيه ناس بتظلم ناس، طبعا فيه ضحايا وغلابة ومتمرمطين، طبعا هى دى الحياة فى كل زمان ومكان معاك إن حياتنا ممكن تكون أحسن من كده لولا فيه ناس معدومة الكفاءة أو الموهبة أو النزاهة أو الضمير أو كل دول بس ما أقدرش أجزم إنك أو إنى مش واحد من الناس دول فإحنا مش بؤساء إحنا ناس عندهم مشاكل، بيحاولوا يلاقوا لها حلول وأنا لو أعرف حل سحرى ما كنتش أعزه عنك، ده أنت أخويا إنما فيه حاجات أبصم لك بالعشرة إنها مش حل.
زى الزعيق والصريخ والولولة دون إضافة أى فائدة لا معلومة ولا تحليل ولا شغل ولا يحزنون.
زى إبداء الآراء فى كل الموضوعات وكل المجالات بنفس القدر من الحمس والثقة.
زى إصدار الأحكام بمنتهى السهولة على الناس والجهات والدول والعالم والكوكب والكل كليلة.
زى انتهاك الخصوم واستحلال خصوصيتهم وسمعتهم وأسمائهم والسخرية منهم عمال على بطال.
زى تصوير الأمر وكأن كل واحد فينا هو الوحيد النقى التقى الطاهر اللى خايف ع البلد ومتأثر بجراحها.
زى اتهام الناس بالبؤس.
لأن كل ده، فضلا عن إنه مش حل، فهو مش حقيقى وبقى مفتعل ومبتذل ومستهلك آخر حاجة.
الطرق دى مش حل
الطرق دى هى البؤس بعينه
تصبحوا على خير. •