أنا ليه ماتجوزتش لحد دلوقتي ؟!

1 - ماعنديش استعداد اصحى من النوم ألاقى مخلوق نايم جنبى سمبوكسه ومحتل 90% من السرير وساحب الغطا كله.
2 - ماعنديش استعداد ابقى رايح أي مناسبة والبس في عشر دقايق واستنى نفس المخلوق اللى واقف قدام المراية لحد ما المراية قربت تشتمه، وبرضه وهى نازله بيبقى عندها إحساس إنها ناقصها حاجه أو مش جاهزه اوى يعنى.
3 - ماعنديش أي استعداد ابقى قاعد اتفرج على ماتش وألاقى مخلوق يقولى هي مش دى كورة قدم، أومال بيقف على الخط ويحدفها بايده ليه، مش دى كرة يد.
4 - مش شايف نفسى خالص ولا قادر أتخيل إنى ممكن أسحب العجله الحديد دى في كارفور وأبقى ماشى ورا مخلوق مهما كنت بحبه.
5 - ماعنديش استعداد اصرف نص مرتبى على فستان زى بتاع صاحبتها اللى كانت لابساه في فرح صاحبتهم.
6 - ماعنديش استعداد اسمعها في مكالمة تليفون بتحكى لواحده صاحبتها الحلقه 167 بتاعت مسلسل "الفسق الممنوع" بتاع مهند اللى ماسموش مهند في المسلسل ده.
7 - أينعم أنا عندى كرش لكن عمرى ما هشيل جورنالى تحت باطى وبطيخه تحت باطى التانى.
8 - ماعنديش استعداد أغير للواد البامبرز لحد ما هي تخلص الاكل، مش هاكل، ماله الديليفرى يعنى ماله ها ؟!
9- أنا أصلا كائن عشوائى لا بحب أقفل باب تلاجة، ولا بحب اطفى النور، ولا احط الشرابات في مكانها.
10 - ماعنديش استعداد أسكن في بيت أمها عايزه تبقى رئيس مجلس إدارته، وعلى المتضرر اللجوء للقضاء.
11- أنا اغض البصر عشان أخلاقى آه؛ لكن أغضه عشان خايف من الرادار اللى قاعد مراقبنى لا يمكن أبدا.
12- أنا ممكن أتخيل أي مصيبة تحصلى إلا انى أدى لاى مخلوق الباسورد بتاع الفيس.
13- تليفونى جهاز إستراتيجي وغير مصرح نهائيا باختراقه والاطلاع على الرسايل والكونتاكت.
14- ماعنديش استعداد اتخانق مع مخلوق يسمعنى كلام زى السم 6 ساعات متواصله، وفى الاخر تقولى خلينى ساكته أحسن، إلهى تتشكي في لسانك يا بعيدة.
16 - ماعنديش استعداد أقطع علاقتى بخدمة عملا كنتاكى وماك وبيسترو والذي منه، وبرضه ماعنديش استعداد أخلى الأوردر لشخصين المرتب مش ناقص.
17 - ماعنديش استعداد أدفع دم قلبى في عربية تخبطها يوميا، وهى بتركن.
18 - الاعياد عندى عيد الفطر وعيد الاضحى وأحيانا تحرير سيناء، وأنا بأزأز لب وبتفرج على الاستاذ نبيل الحلفاوى وهو عامل نفسه ضفدعة بشريه بكرش، إنما تقولى فلانتين وعيد جوازنا وعيد أول مره اتقابلنا وعيد ميلادها وعيد أمها فاكس.
- أصلا في ناس بتروح تتجوز علشان تكمل نص دينها فبتخسر النصين.