رباعيات

أعشق جنون البحر وأعشق سكونه
وأتمنى يبقى هوه أنا أو أكونه
البحر هش فى وشى قال.....
ما أنتم بحور زيى بس كونوا
•• ••
يا ما فيك يا بحر حاجات كتير مختفية
فيك لولى حر.. وفيك نجوم منطفية
وأمواج عفية.. والقرار هادى عادى
أنا اللى فيك يا بحر وألا أنت فيا
•• ••
تايه أنا ف بحر الحياة باتنفض
والموج بيعلا ف قلبى وبينخفض
نجم الطريق يشاورلى على ميت طريق
إيه تقبل منها وإيه يترفض... ؟!
•• ••
بين آه ولأ .. واخدانى لحظة قلق
ح أصرخ بعزم الصوت وأصحى الملأ
إلا وبرق فى البال خيال قال لى عيش
سلمت لك قلبى .. شراعى انطلق
•• ••
ح تقوم يا موج ؟! وماله ما أنا قمت لك
ح تروح. تحمحم.. برضه حمحمت لك
معلوم يا موج.. ما هو أنت علمتنى
إنك ح تغدر بيا لو نمت.. لك
•• ••
الموج ده .. ولا عرف خيل الجنون؟!
ولا ده شوق مطلوق لعالم حنون؟!
على فين يا موج يا حرون؟ ضحك لى وقال:
ح أسيل فى ليل الويل لشط المنون
•• ••
مركب وبحر .. وواد وبنت.. وهوى
فجأة عوى الريح.. نجم من فوق هوى
طلعنا نبكى.. كل حى فى طريق
ليه يا حبيبتى الفرحة بتموت هوا؟!
•• ••
البحر قال لى اسمعنى.. أنا مش ح أضلك
تبت فى خلك .. هوه ده اللى فاضل لك
أنا قلت خللى خلا بى.. قال: خللى بالك
تبت فى خلك.. يعنى تبت فى ضلك
•• ••
سوى سمك موسى ف زمن مش سوى
مسلم ده ولا مسيحى.. أو موسوى؟!
با سأل أنا.. قام بص لى بنص عين!
فين الجواب؟ قال ده سؤال مأسوى
•• ••
شفت السمك فى البحر داخل سبق
واللى بياكل أخوه .. واللى اتدبق
أنا قلت ليه بتاكلوا فى بعض ليه؟
وكلكم آخرتكو نفس الطبق!!
•• ••
الرمل قال: سمعتو ا آخر نبأ
الموج على الموج انطبق م الشبق
قال المحار: أهو ده اللى عاش الحياة
مش اللى زيى فى القرار اختبأ
•• ••
أحلى ما فيك.. إن أنت دايما جديد
فى لحظة صافى.. ولحظة جافى وشديد
والجرح يدبل فيك.. وأرض العباد
من الرقاد ع الجرح عبت صديد
•• ••
«بتحبنى يا بحر».. .قال «وأنت ابنى»
مصاحبنى. وشاربنى.. وجنونك عاجبنى
«طب ليه يا عينى».. لسه ح أسأل لقيت
موجه ضاربنى.. قالبنى .. «إيه ح تحاسبنى»