الفرق الوحيد.. هتقعد على قهوة إيه؟

«خلصت شهور الإجازة يا خسارة ودخلنا على الدراسة».. الإحساس ده بقالى فترة محستهوش أولا لأنى اتخرجت وبشتغل من 7 سنين، ثانياً لأن يا دوب السنة دى ابنى هيدخل «كى جى».. ومن هنا بدأت المشكلة.. كنت فاكرة إن كى جى يعنى أقدم له فى أى مكان.. واكتشفت وأنا بلف فى ترس دوامة المدارس أنى انضميت لجروب «آه يانى عليا وأنا على المدارس رايحه جايه»، محتارة حيرة أم العروسة وهى بتفرش نيش بنتها اللى يعتبر قداسته من قداسة المتحف المصرى ومحتارة تحط الأركوبال الأسود فى الوش ولا الصينى المدهب؟!!
اكتشفت إن فى مليون نظام للتعليم مع إنى سايبة الجامعة من 7 سنين بس!!.. أنا على أيامى فى الثانوية العامة، هما كانت الخاصة لغات والحكومى العادية والآى جى ودول كانوا قمة التعليم والناس اللى من كوكب تانى متقدرش تتكلم أو تتعامل معاه لأنهم شايفين أنهم فوق كل الأنظمة التعليمية اللى بيدخلها رعاع البشر.. مش هتكلم عن الناحية الطبقية والعنصرية اللى بيكتسبها الأطفال بمجرد ما يبدأ يلبس يونيفورم بكام ألف جنيه.. ولا هتسأل هى المريلة البيج راحت فين!!
اكتشفت إن عشان أدخل ابنى كى جى لازم يبقى مظبوط ولا ظبطة رشيدى الميزان بالشهر واليوم والساعة وأن عشان فرق أيام ميدخلش ويا إما يستنى سنة كاملة بادور فى مدرسة تانيه أوديه لها حتى لو كانت فى السلوم عشان متضعش عليه السنة؟؟!! مش هتكلم عن فرص الأطفال اللى بتضيع عليهم سنين عشان خاطر سنهم!!
أنا هتكلم عن كم المدارس اللى ظهرت فجاة.. ابتداء من مدارس الانترناشيونال المتواجدة من فترة.. والمدارس المتخصصة.. زى المدرسة الألمانية، التركية، البريطانية والإيطالية والهندية!! ولا كأنى ماسكة مينيو من كل بلد أكلة.. نرجع لمربط الفرس.. العيال اللى بتتخرج هما فين؟ ومتعلمين إيه؟
بدأت البحث عن مدرسة يتعلم فيها سألت ولد فى الشارع لو سمحت هى مدرسة «على بن أبى طالب الحكومية فين؟» قالى بمنتهى السرعة وخلال فيمتو ثانية تفكير أو تردد: آه تقصدى حضرتك المدرسة اللى واخدين فيها إجازة علطول؟؟
قولتله: لأ دى شغالة طول السنة..
قالى: أيوه أيوه ما هى شغالة يعنى البوابة مفتوحة بس العيال مبتحضرش.. هتلاقيهم كلهم فى حوش المدرسة أو فى حصة الموسيقى أو على سطح المدرسة والمدرس بيشرح نص لبة ويكمل فى الدرس الخصوصى..
قاطعته بمنتهى الحزن على حال المدارس الحكومى أو أغلبها: خلاص مش عايزة أعرف مكانها شكراً .. مشيت وأنا بفكر وبسأل بنات أفكارى يمكن تكون واحدة فيهم صاحية بتشرب نسكافيه تاخد وتدى معايا.. هو أنا لما أحب أقدم لابنى أوديه فين؟؟ وقبل ما بنات أفكارى ترد عليا.. وأنا ماشية لقيت باص مدرسة واقف قدام عمارة وعيال نازلين شكلهم لسه طالعين من الغسالة الفول أوتوماتيك حالا.. كتبت اسم المدرسة اللى على الباص وعملت سيرش على النت وعرفت إنها فى التجمع واتجهت هناك.. ويارتنى ما روحت..
يعنى إيه «كى جى 1» ب 23 ألف من غير الباص!!! الله يرحمك يا جدتى لو كانت عايشة كانت ماتت مقهورة، على زمنها مكنش فيه غير الكٌتاب وبيدفعوله بالأكل مرة فطير مشلتت ومرة فتة ويوم ما بتجبله بطة بيعينها مديرة الفصل على العيال!!
بدأت أعقد مقارنات هو لو أنا دخلت ابنى انترناشيونال هيطلع متعلم وفاهم عن لو دخل مدرسة خاصة لغات عادى؟؟ لو دخلته مدارس أجنبية هيبقى المدرس بيشرح ومش هيحتاج لدرس ولا ملهاش علاقة بالمدرسين طالما المدرس نفسه مصرى مش هيفرق فى مدرسة لغات أو حكومى أو أجنبى؟ هى المدارس دى فعلاً بيزنس وفلوس وابنى هيدخل مش هيتعلم أكتر من اللى هيتعلمه لو دخل مدرسة عادية؟ ما هو ابن طنط سهام فى مدارس أجنبية والولد فاشل وبيسقط وما بيعرفش يقرا إنجليزى وبيكتب عربى مكسر.. طيب ولما ابنى يتخرج ويدخل جامعة خاصة طبعا ويتخرج هيفرق شهاداته عن شهادات واحد تانى اتعلم تعليم مجانى أو خاص وهيلاقى شغل؟؟ ولا المفروض أنى طالما عرفت أصرف كل ده إنى أصرف عليه ويطير بره مصر يشتغل؟ أو أفتحله مشروع بقى بجملة المصاريف.. ولما خدت بانوراما بعنيا لكل الأولاد اللى أعرفهم فى العيلة وعائلات أصحابى وجيرانى ومعارفى.. لقيتها مش هتفرق خالص وأن الملجأ الوحيد لينا حاليا بما أننا من الطبقة الكادحة الوسطى المدارس التجريبى لسه المدرسين بيحضروا والطلاب بتلتزم.. وإن المدارس الأجنبية والمتخصصة كل ده بيزنس تحت اسم الوجاهة الاجتماعية عشان ابنى مينفعش يدخل مدرسة أقل من مدرسة سليم ابن طنط باكينجهام!. وفى النهاية منظومة التعليم فاسدة بتدور على مص أولياء الأمور إما بيزنس أو دروس خصوصية وفى كل الأحوال الولاد بتتخرج ما بتلاقيش شغل وبيقعدوا على أول قهوة بيقابلوها مع فرق بسيط ..

إن ابن عم مصطفى خريج المدرسة الحكومى هيقعد على قهوة «حماصة» اللى على الناصية وخريجى المدارس الأجنبية هيقعدوا فى «كوستا كافيه»!!•