مبارك.. وعياله.. وهلوسة ستنا الشيخة!

بدأت محاكمة الحاج مبارك مرة أخري الذي افتقدنا طلته البهية وهو راقد في القفص بيلعب في مناخيره ولو كان القاضي استني عليه شوية كان طلع منها أرانب وكتاكيت، ولولا الملامة وقمصة الثوار كنا خدناله كام كيلو مانجة زيارة لأن الست أم جمال بتكوش علي الأكل عشان تزغط العيال وسيباه يا ضنايا من غير لقمة يتقوت بيها ولا شوية عصير يبلوا ريقة بدأت محاكمة الحاج مبارك مرة أخري وأن كانت قد فقدت بريقها وإثارتها أمام بريق وإثارة بتوع الفانوس يسعد المنحوس ويجلي الصدر ويهدي النفوس واوعي تعيد علي المسيحي.. لتعيش عيشته قرديحي.. والله أعلم وظهور جماعة الأمر بالمعروف والنهي عن المنكر وهو ما تنبأنا به فعلاً منذ عدة شهور، وسوف يأخذون الناقة ويطلعون علي السعودية في دورة تدريبية علي استعمال الشوم والسنج والمطاوي وكيفية معرفة المسلم من المسيحي عن طريق حاسة الشم وكيفية ضرب الحقن الشرجية للعيال الكفرة وركوب الجن والعفاريت.
بدأت محاكمة الحاج مبارك الذي يبدو أنه كان صايع قوي وبتاع نسوان جامد بدليل احتشاد العشرات من عياله أمام قاعة المحكمة هاتفين مهللين «مبارك مش عتريس والثورة راحت فطيس» وكالعادة أيضا ظهرت الشيخة ماجدة في وصلة كوميدية رائعة ولا الحاج شارلي شابلن في زمانه والتي أعلنت قبل ذلك أن اللي ضرب العيال في التحرير بتوع حماس وإيران واعترفوا لها بلسانهم لكنها تجاوزت هذه المرة حدود المعرفة الوقتية لحدود كشف المستقبل بعد أن أنار الله بصيرتها وكشف عنها الحجاب ولأنها ست مؤمنة قررت أن تطلعنا علي الغيب جايز نخلي عند أهلنا دم ونعملها مقام جنب مقام الحاج حسني رضي الله عنهما، فقد أعلنت الشيخة المبروكة لمراسل قناة أون تي في أن أحد رؤساء الدول لن تقول اسمه قد عينها مستشارة روحية له! وطبعا كان نفسنا نعرف مين الرئيس المعتوه اللي هيحكم شعبه بقراية الفنجان والكف ويمشي الدولة طبقا لأحلام الشيخة ماجدة عشان نبلغ عنه الخانكة لأنه أكيد هربان من عندهم.
وبعد أن أثلجت صدورنا بهذا الشرف العظيم الذي نالته مؤخراً وأصبحت رأسها برأس زويل ومصطفي السيد وجايز أجدع كمان، علي الأقل لا بيشوفوا أحلام ولا يعرفوا في الروحانيات ويا ريت يفقعوها جايزة نوبل لقراءة الكف والفنجان وصوابع الرجل، كمان أعلنت الشيخة المبروكة أنه لو ما تمش الإفراج عن مبارك ويلعب في مناخير الشعب زي ما هو عاوز ويرجع للحكم تاني ويسرح في غيطان المانجة كلها يتسلي فيها زي ما يحب مصر ها تحتل!! امتي يا ستنا الشيخة؟! قالتلك السنة الجاية ومش كده وبس هايحصل زلزال جامد جداً وها يروح فيه خلق ياما تقولش سيدنا نوح عليه السلام؟! ولا نبي جديد وشعبه الحرامي كفر بيه فربنا هاينتقم منهم بالزلزال والاحتلال.. وطبعاً ستنا ما قالتش مين اللي هايحتلنا يعني أمريكا ولا إيران ولا الصومال؟! جايز دي مفاجأة والوحي بتاعها واخذ عليها العد ما تقولش عشان ياخدونا علي خوانة.. وبعدين اشمعني كل أحلام الشيخة دي عن مبارك لوحده يعني ليه ما شافتش رؤيا حلوة كده ترد الروح وتشرح القلب لجميل جمال مالوش مثال ولا شافت أي حاجة للست أم جمال المتبهدلة دلوقت ما بين العيال وجوزها اللي ماسك في الدنيا بأيديه وسنانه؟! ومش عاوز يخلص الليلة وما تعرفش يا أخي هايرجع يحكمنا تاني إزاي عشان ما يبوظش حلم الست الشيخة وهو أساساً مش قادر يحكم نفسه.. ويا أخوانا حد يشوف الست دي ينوبكم فيها ثواب قبل الأمريكان ما يخطفوها.