محمد أحمد نجم منتخب الصالات: دخلت اللعبة ب«كدبة بيضا»!!

كدبت عليهم علشان أخوش المنتخب وبعد كدة قولت الحقيقة هكذا بدأ محمد أحمد محمد صاحب ال18 عاما فى منتخب الصالات والذى حصل على البرونزية الأخيرة حديثه مع جريدة «روزاليوسف».■ ما بدايتك فى كرة القدم وكيف تم انضمامك لمنتخب الصالات؟
+ انا مكنتش بلعب كوره فى ناد انا كنت بلعب خماسى فى الشارع ومراكز الشباب و جه واحد عندنا كان بيلعب فى نادى الشمس خماسى ولعب منتخب مصر فمكنش يعرفنى وكان يعرف واحد صاحبى قاله على الموضوع وروحت انا مشروع الهدف علشان الاختبارات اول ما دخلنا كان كل واحد بيكتب اسمه واسم النادى بتاعه انا مكنتش بلعب فى نادى فاتكسفت طبعا مقولش اسم نادى فروحت قايل اسم نادى كدب علشان اخش معهم بعدها قولت للى ودانى هناك قالى لازم تنزل تقولهم الحقيقة عشان هما مابيحبوش حد يكدب عليهم والموضوع خلص والحمدلله كنت معاهم ف المنتخب خالونى اروح نادى البنك الاهلى وأمضى فيه
■ ما الفرق بين الملعب الكبير والملعب الخماسى؟
- الفرق بين الملعب الكبير والخماسى الملعب الكبير بيبقى ليك مراكز وادوار هجوميه ودفاعية وتعليمات بتعملها لكن الخماسى فيه قوانين واساس لازم تتعلمها وتحفظها وجمل بتتعمل ف الملعب وتيكتيك فى الخماسى تسرح ثانيه يدخل فيك جول ولازم الكل يدافع والكل يهاجم لان الملعب الخماسى صغير ماينفعش حد يكسل فيه او يكون وحش لانه هيوقع زمايله معاه وكمان حكايه النفس واللياقة لكن ف الملعب الكبير انت عادى تقف تاخد نفسك عكس الخماسى وممكن واحد يقع من الفرقه معاه 10 يغطوه ويداروه لكن الخماسى مفهوش كده.
■ هل تحدث معاك اى مسئول أجنبى من المتواجدين فى البطولة؟
- لم يتحدت معى أى مسؤل اجنبى
■ ماذا قال لكم الجهاز الفنى بين شوطى المباراة عقب الخسارة بثلاثة أهداف؟
- قالوا لينا النتيجه دلوقتى 3/1 يعنى جه فى الشوط الاول 4 اجوال يعنى تقدروا الشوط التانى تجيبوا 4 او 5 أجوال يعنى تقدروا تكسبه وركزوا وشوطوا على الارض الجون بتاعهم وحش على الارض مع العلم ان احنا كنا فقدنا الأمل بعض الشئ لكن خبرات كابتن هشام وكابتن نادر رجعتنا للماتش تانى والحمدلله قدرنا نفوز على الارجنتين فى مباراة صعبة للغاية.
■ هل تلقيت عروضا من فرق كبرى مثل الأهلى والزمالك هل تتمنى الاستكمال مع منتخب الصالات أم الانضمام للمنتخب الوطنى؟
- لا للأسف لسه مجاليش اَى عروض بس ربنا يكرم واتمنى اللعب للمنتخب الوطنى للملعب الكبير ومنتخب الصالات ده شرف لأى لاعب.
■ ما طموحك خلال الفترة القادمة؟
- طموحى الفتره القادمة الاحتراف والصعود للمنتخب الاول واعمل حاجه كويسه بأذن الله.