واحة الإبداع.. ضريح الشوق

يسيل بجوار النيل فى بر مصر نهر آخر من الإبداع.. يشق مجراه بالكلمات عبر السنين.. تنتقل فنونه عبر الأجيال والأنجال.. فى سلسلة لم تنقطع.. وكأن كل جيل يودع سره فى الآخر.. ناشرا السحر الحلال.. والحكمة فى أجمل أثوابها.. فى هذه الصفحة نجمع شذرات من هذا السحر.. من الشعر.. سيد فنون القول.. ومن القصص القصيرة.. بعوالمها وطلاسمها.. تجرى الكلمات على ألسنة شابة موهوبة.. تتلمس طريقها بين الحارات والأزقة.. تطرق أبواب العشاق والمريدين. إن كنت تمتلك موهبة الكتابة والإبداع.. شارك مع فريق «روزاليوسف» فى تحرير هذه الصفحة بإرسال مشاركتك من قصائد أو قصص قصيرة «على ألا تتعدى 055 كلمة» على الإيميل التالى: [email protected]
اللوحات للفنان وجيه يسى
ضريح الشوق
شعر - تيام الشافعي
وباسم الحزن اللى كان سايل سنين ع الخد
وباسم النار اللى كات لابده ف جدار الحلق
أنا هانزع
حروف عشقك
بداخل كل لحظة شوق
وهاقتل
فى الوجع دمعة
بتتسرسب
واضُخ الكون
بوِرد جديد
بيتهجّى صدى الأنوار
فى عز ماكانت الدنيا
فى حلق الظلم تستطعم سلاح الغدر..
وكان القهر بيكتّف
جراحى ومهجتى بالدم
وفرّع
فى الجسد م الهم
ومرّر كل أنفاسى..
ولسا الجرح
بيصُب ف وريد النوح
ومش قادر
يطول نظرة من الرحمة
ومتكتف بذل الغلب والمحنة..
وانا عينى
نزيفها جف وابيضت
ومش لاقى شروق فيها
وخانّى الديب
وبيفرّق
بواقى من مآسيها..
وبيجرّح
خيوط الصدق من توبى
وبيلطَّخ
قميصى بدم من شوقي
وانا قهرى
زرَع كل السجون صبار
وكل نهار
يجينى يصلى ويسبّح
ويستنى
بواقى الصبح فى الملكوت..
وبترجاك يا اخناتون
بحق السجن والأوجاع..
وطيف الوحى
والصفّة على الأتباع
وحق الطفل فى المهد اتوهب لله
لإمتى السحر هايفكّك عضام الضى؟!
وإمتى الحق هايفتّت حيطان الزيف
وكل رغيف
هايتوضا بنور القمح..
يا إخناتون
كبير الكهنة بينازع
وبيسلَّم جراحى ل أخلص العبّاد
ولساه الشرف محْنِى
على الأعتاب
على اكتافه جبال اليتم
وفى ضلوعه
بحور القهر والحرمان
وفى جيوبه
سنابل خضرا منسيّه..
قوليلى ازاى
يشوفك جرحى قدامه ومايدمّعش
واخبّى محنتى بإيدى
واخلى بكاها من غير صوت
دنا بنطق
حروف عشقك فى عز النوم..
قوليلى ازاى
أتوه منك
وانا فيكى وَتَر تسابيح
واخبى إزاى
نيران سهدى
وعشقك ريحته فى التباريح..
خلاص
أخدت عزاها فى السماوات
ومتكفّن هواها هناك بتوب القهر
وحتى الشمس كات مصلوبة
وبتنزف بواقى المهر
وبتعزّى
بواقى عشقها المدبوح..
خلاص إسمك
بقا ذكرى
فيآيات النِدا والنوح
وصورتك
فى الخلا بتسرى فى شريانى..
هنا عاشق
بيسقى الزرع
بفرع النيل فى أنفاسه
هنا بتكتب بدم الغلب أنّاته
جريح الحق
بيعزّى ف ضريح الشوق
جريح الحق بيعزّى
ضريح الشوق...