أربع قصائد شعر : طاهر البرنبالي

"1" زاد م المدد
ف الحضن مفروض تحس بمدد
وبمرجحه للنور
والقلب يرقص محبه وسماحه..
من روعة الأرغول
حضر جراحك للخلاص منها للأبد
وهيأ النفس العفيفه لحقها ف الغنا الواجب..
علشان ترد الحق لصحابه..مشبوك بطرف نخيل..
وتشعلل البهجه الوليده..علي ضفتين النيل
ما فيش مكان للفرح غير لما تلضم مهجتك بالكون
والفرحه مش بس حبة أو ندهتين زغاليل
الفرحه زاد م المدد..وخلع ناب للغول..
والقلب يرقص محبه وسماحه..من روعة الأرغول
"2" بكره المتكعبل
شمروخ علي راس الفقر اللي متبت فيا
وصاروخ م الروح اللي بتكره خوفي المتشعلق..
ف التوب الدايب ومبين كل الجسم
ما تقول لي يا بكره المتشوش ف طريقك..
إزاي هيكون النصر الشافي بإيد الحسم
أنا شخت وشاخت جوايا الأحلام النيه
والصبر ماعادش خلاص بيأثر مفعوله..
أو راح سواح مع صدق النيه
"3" إمسك فرصه
تتغربل روحك تنزل فتافيت م القهر
تتصفي الصوره اللي انت واخدها لنفسك..
علي وش حزين متكفن بالأوجاع البايخه
تتمايل علي غصنك أوراق بهتانه ويأسانه
إعرف إن الفرح اللي بتحلم بيه هيفوت ع السكه
بس ساعتها ما تقوليش إن عينيك دايخه
أو إن العصب الخامس خلا خدودك شايخه
إمسك ف الفرصه و قوم علي حيلك واقف
الفرصه لما بتكبر وتكون فرصه ما بتتكررش
"4" ف الأصل رباب
جاوب علي نفسك قبل سؤال ما يجيلك من جواها
و اكتب ع الصفحه الأولي..مانيش مهزوم..
أنا قلب غزال يتغزلن وقت الآهه..
لكني أبداً ما اتعلمت اليأس ف درس
ولا حتي قريت عنه حروف ف كتاب كداب
أنا صاحب كل العصافير الواقفه علي شجر النيل..
وتقول للخلق إن أنا ف الأصل رباب..
تقدر روح التعبان تسمعها وتشد الحيل