علم مصر بأجسام المصريين

أستغفر الله العظيم، انا مبحبش اتكلم كتير..علشان كده بعبر عن نفسي في كتابات مختصرة، وعاوز أشكر "فيتو" انها ادتلي الفرصة اللي أعبر بيها عن نفسي.
بالامس.. كنت بتكلم مع صديق لي وقاعدين حاطين همنا على هم بعض وبنتكلم في اللي بيحصل في البلد، لقيته بيقولي محدش مرتاح وكأن الواحد قاعد على كرسي ب3 رجول.. وفيه مننا اللي قاعد على كرسي برجل واحدة بس.
لما روحت لقيت نفسي بفكر في كلامه وبالتشبيه اللي هو شبه بيه الوضع اللي بيمر بيه الشعب.. حقيقي الناس مش عارفة تاخد ابسط حقوقها مش عارفة تعيش ومش لاقية لقمة تاكلها ومع كل ده بيموتوا وبيضحك عليهم من جانب ناس أقل ما أوصفهم بيه إنهم... انا راجل محترم ومبتطلعش من بقي العيبة.. الإخوان ماشيين يقتلوا ده ويدبحوا ده ويستخبوا في الجامع ده ويحرقوا الكنيسة دي..وشكلها مفيهاش بعدين.. الناس نفسها في نهاية للي بيحصل حتى لو يفضلوا مطحونين بس يعيشوا في أمان.
الشعب دلوقتي مقسوم لتلات فئات أو بمعنى أدق بتلات أوضاع.. محروق.. متكفن..غرقان في دمه وكأنهم بيرسموا علم مصر بألوانه (الاسود والأبيض والأحمر) بأجسامهم.
لك الله يا مصر وحسبي الله ونعم الوكيل...