قصائد

صيص
شايفك طشاش
وإلا أنت اللي واقف
بعيد؟!!..
مكبوح حصانك يافتيِ
وجريح..

خدوك هناك
في ليله كُحل
وحتّه .. مات فيها القمر
والخوف
ملبّش جتّتك
والريح.. جريح
والموت
محاوطك م الجهات الأربعة
وسابوك..

كهفين في وشك.. وبوم
وحدايات بتحوم
وجُثتك.. ع المشنقة
متعلقَة
ومبتهجة!!..

قامت.. عليك العواصف..
والشمس اللي ياما
دهّبت
ساعة الأصيل.. خوصَك
وغنّت.. علي العراجين
زغلول.. وحيّاني
جوّه الضلوع
ناحِت..

نعِق .. غراب البين
وانفرط من ع البساط
نبضك..
من قد إيه
ماحطّش ع الوتر
قلبك؟!!..
من قد إيه
ماحطش ع الوجَع
موّال؟!!..

ياطير. وسارح في الفضا
إنزل
ولقّط
من علي خد الوتَر
دمعاته..

شح السراج
والزيت..
عم العتام.. البيت
ياعشق
وعز موالك..
.. ..
يا أرض طافح ملحها
مالك
بقي كل طرحك
صيص..
بوح
شفق
دا والاَّ
والاَّ الأفق مجروح؟!
خضّب
جناحات السحاب
والبوح..

ومين عكّر ينابيعك
ونشفها
ومين ياصاحبي بيبيعك
وبيساومك
علي رغيفها
ومين حفرك
علي صخور الأسي
والنوح..

مازالت
في التاريخ بتفوح
روايح مجد أيامك
ولسه مازال
بتتنزل
ملايكة وحي إلهامك
تجلّي الرب في سينا
فحطّم
كل أصنامك..

روح
واطلق
حصان البوح..
وافتح شبابيك البدن
للروح..
وأشهر في وش الريح
قلوعك..
لم الحروف
طوف
شد من جوف الأمي
شمسك..
وافرد
جناحك ع الهوي
وافرد
ع القمر
وترك
للحر يعزف
غنوته..

غنّي
غنوة الحُب الحمامه..
غنوة الحب اللي ياما
حلْمنا
تلضم قلوب الدنيا
عُقد تعلقُه
في صدر العدالة
غنوة الحُب الحمامه
غنوة الحُب اللي تفقس
فوق شبابيك اللي عشقك
كل يوم
ورده
وكتاب
نحل القهر.. وتطهر
أراضينا
ومركبة الأمان ترسي
ف مراسينا..
وأوتار القلوب.. تصدح
نغم
مش خوف..
توجس
شبابيك عيونك كلها
ليه مفتوحين
ع الظن؟!!..
مافيهمش غير شبَاك
من بين خصاص الشيش
باصص
علي بكره..
لكن.. علي استحياء
والقلب
متوجس..

ما بين خوافق أربعة
بيهيجوا الزعابيب..
طيرِك
خفق..
لاضي في دروبك دَفق
ولامرتفق..
..
..
والموج
عُباب..

قاعدة ترتَقي ف جرحك
والاَّ
بتغزلي ف موال؟!!..
..
..
لاشالك شمالك
ولا
يمينك
شال..

مين اللي قال:
الحلم كان نار وانطفأ؟
مين اللي دخلنا ف نفق!!
مع كل خطوة بتنكلفأ
دا الحلم أوسع من الخيال وم الأفق
جايز
صحيح
مايكونش عارفين نتفق
لكن أكيد
ما احناش
همْأ..