شمروخ الأراجوز

في ذكري صرخة يناير
هبيّ يا أنسام يناير
أطردي ريح الفساد
فكري الشعب اللي صابر
إن مصر أم البلاد
واكسري شوكة اللي كابر
واللي سايق في العناد
مش ح أقول لك مجد غابر
وعلي الله لاعتماد
الحقوق ماهيش أوامر
ولا جحر وصار رماد
لسّه نبضك حلم فاير
لسّه في أولادك ولاد
فاكسري طوق الدواير
واطردي جيوش الجراد
اللي صبحوا بيك أكابر
وخانوك يوم الحصاد
إطلقي صرخة يناير
وإنتي إيدك ع الزناد!

إعتراف لابد منه
لاعْتراف الأدبي م «الدستور» بشعري
أغنَي عن كل الشهادات والجوايز
أنا ياللي شعري قد ليالي عمري
أكفي شعبي بفنيّ لو للشعر عايز
إنما غمّموه وسَلَبوه من مشاعُره
دوّخوه ع اللقمة حاصروه بالحواجز
رهنوه للماضي يفتل حبل صبره
وارتضوا له سكة لا أبواب لا نوافذ
شنقوا أشعاره بأوتار الربابة
كفنوا الشعرا ف كشوف فرْق الحوافز
فهربت بشعري لأحضان الغلابة
في مدي الحرية أغنّي - قلت جايز
لاعتراف الشعبي م الجمهور بشعري
يغني عن قفف الريالات والبرايز

في السياسة العولميّة
ضرب الحراك الجنوبي؟ والاّ ضرب القاعدة؟
وأمن مصر القومي والاّ المعاهدة؟
بتفنّط الكوتشينة ليه تاني يا أوباما.. دبّحت أهالينا ياما.. وقلت دي مساعدة
{{{
وخيوط عرايسك على رقاب الوطن عاقدة

في شأن الجبهة الوطنية
في ساحة المواجهة مابتسألش انت فين؟
يسار وإلا يمين
وعلي خط المجابهة مابتسألش انت مين؟
نصاري.. مسلمين..
في حب مصر - جبهة..
بالنيل متوحدين!

إعلان للحزب الوطني
«من أجلك إنت..» يا حلو طلبك عندنا..
بس انت دوس زرّ القبول وشرّف حزبنا..
مين أولْي منك في البلد دي.. ما تلاقيش
شارب مجاري وسم هاري ف خيمة خيش وتحبنا..
والألف عيش لو يوم تطوله تدعي لينا ربنا

إلي نصر حامد أبوزيد
إيه يحتاجه الانسان المتعب بصفاء الروح
أكتر من وردة نّدية.. وشباك مفتوح
عصفورة علي الصبحّية
شجرة.. ترشرش خضرة فوق جدران النفط
الأسمنت المتعافي علي المدن العصرية
فرحة.. تزغلل أشواق الدنيا
في عيون المحبوبة المصرّية
ضحكة سِنّ حنونة.. تشاركه هموم الحرية
تمسَح دمع عينيِه
لو عَز عليه الوطن المغصوب
تمنع عنّه خرابيش اللحظات السّو
{{{
إيه يحتاجُه الإنسان من ضهر الدنيا
غير كف وليفَة.. تنفض عنه غبْرة ريح الجهل
وصحبة أليفَة.. تشيل وياه الصّعب
تحوش عنه السّهل المتهان
المتحصّن ورا خرابيش النسيان
في عالم كاره يخرج من ليلُه
المطفيّه نجومه
فيسلمّ عصافير بكرة الخضرا
لحناشُه ولبُومه!!
{{{
إيه يحتاجه نصر بن أبوزيد
غير إنسانة تحبّه
وتعوم في كل بحار الدنيا..
بكل إرادة حبها
علي عومُه!.

في الشأن الثقافي
سلماوي.. حجازي وعصفور
من أزهي علامات العصر
من نص القرنين وكسور
قلبوا هزيمة الأمة.. لنصر
وف عشق أم مصر .. علّقوا الثقافة
في مواجهة الخرافة..
زينة في غاية اللطافة
فوق حيط الدولة القومي
وعلي شرفات القصر

ثقافة الخدّامين
ثقافة الخدامين هاجمهَ بجرادلها
تنقع تاريخ الوطن في طشت هلاهيلها
تعصرها بعد الهزايم بالديون والهم
تنقل نافوخ البشر من رأسَها لديلها
سيراميك وميلامين.. لكين مطفيّة قناديلها
{{{
والخدامين علي كل لون جاهزين
يسار إذا شئت وان لمْ شئت تبقي يمين
شايلين مقشات ترش تقش وتنفّض
تحك وتلُك تعجن لَت ع الوشين
إذ كل ثورة.. لها ظروفها ومراحلها..
{{{
وإحنا ركوبةِ اللي نط وهزّ رجُلينُه
حتي لو اهطل غبي حَطّت بنا سنينه
نقول عليه عبقري شايف اللي ما نشوفه
مالك ظروفه مِشَبْرقنا بملايينه
حتي ولو كان عماها يوم.. ماكحّلها
{{{
وتعالي لو نص شاعر والاّ ربع أديب
ح نوظّفك نُشطفك وننظّفك م العيب
وأنت بقَي وهمّتَك. الموهبة أنواع
أشطرها أتباع لكن ليها ضوافر ديب
صاينة جِميل كلّ مِين.. من نايبُه.. أَكّلها
{{{
كل السلالم يا تطلع بيك يا تنزل بك!
وعليك تضحي ولو طلبوا البعيد «ز..»
تكون ممخمخ وجاهز في العلَن والسر
الكل حّ يقِرّ.. ليك إن بعضهم حَبك
ولبدت علي الخط لو قَلَبوها. تعدلها..
{{{
في المهرجان استعد افتح علي البحري
في كل شيء إفتي من يقرا ويسْتجَري
كل القرون وسُطي ما تفكّرش إيه بكرة
لا تحب لا تكره يا دوبكْ حضرتك كوبري
روحك جاكِتة.. بيملكها اللي يغسلها
{{{
إيه يعني إن المعارض ناس ما بتشوفْها
وكل ندوة بغَدوة ورهَن بظروفها
ودا كله ماهوش مهم ما دامت الشاشة
والكورة ساتراها لوجَت أزمة تكشفها
والخلق لو هَبّلت قادرين نِعَقّلها
{{{
وبلاش رُطان جعجعَة مع بعض دافنينه
رباية العسكري وراضعين تفانينه
اللي ح تكسب به إلعب بيه ولا يهمك
قلبك عِشق أرضَها حتي طلع دينه
واللي اغتصبها حويط مارضاش يحَبّلها
{{{
وما عادش يا ابني وطن تبكي علي جدودُه
السوق فتح للجميع والمِشُ فيه دوده
كتّاب علي كل لون لكن في هُون واحد
بيدقوا مَيّه.. يطيب القرْع علي عوده
والشاطرة بالفِطرة رجْل الجَحش مَغزلها..
{{{
فخش في اللعبة لا تحزَن ولا تحمرَق
ما عادش خِيرة سِوي تخرس يا حَ تنهّق
إذ كل خدّام ومتعلّق بعرقوبه
يا تبري قلمك وتمسك طبلة وتأرّق
يا إما تحرَق قصايدك نار تقد ليلها!.

رسائل إلى وزير الثقافة
«1»نصيحة
فاروق يا حسني - نصيحة
تكُت وتفلَسع
بالونة كبرت قوي
ومسيرها ح تفرقع
اللي انت طُلتُه.. ونِلْتُه
كفاية - ربك كريم
ما تيجيش في آخرها
علي مليم وتستجدع..
كُلّه ح ينهش في لحمك حيّ
... ويقطع!!
«2» استجداء
يا حضرة الوزير..
ودّيني فرانكفورت
أمالي فيك كبيرة
أكبر من سبعة بنط
لولا عطفك عليّه
من فترة أنا كنت مُت
من صغري روائية
بلسان سبع لغات
واقعية حداثيّة
ثوريّة من سكَات
يوم تحتاجني تلاقيني
أضبط الحاجات
وإن مارضيتش عليّه
أنا فورًا
«جيتو مورْت»!!
«3» إستهبال
أنا شاعر عبقري
موهبتي بالسليقة
مايهمش منظري..
دانا قلبي فيه حريقة
لكن غايتي بريئة
و«خطواتي» جريئة
وإن كانت نصّ نص وشعري ماحَصَلش
لأني واخدها قفش
قبل ما أدوّر بابصّ
وبدل ما أقطع بأقص
بس أنت ارضَي وتلطّف
ربي ما يرميك في ضيقة
لا يرفد لك موظف
ولا يفضح لك حقيقة!!

ورسالة إلي مؤتمر المثقفين!!
دعيتوا مين وانتو محشورين في حظيرته
غير اللي رقصوا معاكو وماجبوش سيرته
ثقافة إيه؟ مانتو راكبينها بحذا غيرها
ولهفتواخيرها من يوم ماكلتوا تصبيرته
{{{
لا يْموها بقي وارحلوا لتدوقوا تكديرته

كلام حزين في الفن
هذا الوطن
محتاج قيامة لناس..
تدفع تمن صحيانه دم
لآخر الأنفاس
وقبل منها أن توعي
همّه واقفين فين؟
ومنين؟ ومع مين؟
مش هوجة من غير راس
دي مصرنا اتخدّرت ياما
بغُنا وحماس

المضيفة
كوبري قصر النيل
الأسود التي تحرسني
كل ليلة تقول:
لو كنا في حديقة
لتشمسنا في العبير
وأكلنا اللحم
الذي لم نشارك في صيده
اللحم الذي منه يهرّب
العمال البؤساء لأبنائهم
لو كنا في غابة
لما استطاعوا اصطيادنا
لأن أظافرنا التي تجرح
لن تداعب الغرباء
لكن
{{{
ها هو البرونز
الذي يطمس العيون
لا يلمع في الشمس
وها نحن
لا نستطيع محْو الغبار
عن رؤوسنا.

الكبابجي والكشرجي
كبابجي جنب الكشرجي وقفوا يتعاتبوا
وكل واحد لعن للتاني خاشّ جدو
يشوفوا مين السبب في خسارة الاتنين
وليه زبون دا ودا ماعادوش بيتغدوا
{{{
قال الكبابجي أنا غرقان في هّم ودين
واللحمة اهه تسمعك مركونة من شهرين
الناس تشوفني وتجري ع البصل والفول
وعند قدرة «عمر» وقفوا عليه صفين
{{{
قال الكشرجي دانا حالي عدم تعبان
العدس غالي ولسّه ناوي يغلي كمان
والناس غلابة ولا واكلين ولا شاربين
و«غالي» نفضّ جيوب العامل الشقيان
{{{
سمع الفرارجي فقال وانا بابكي علي حالي
من يوم ماقفلوا المزارع السعر بقي غالي
و«غالي» عايز ضرايب من شمال ويمين
وحكومة بايعة البلد ولسه قاعدالي
{{{
وقفوا التلاته وقالوا الحل بقي معروف
ما دام الحكومة السبب إحنا بقي ح نشوف
يا يشيلوا غالي ونظيف ويشيلوا محيي الدين
يا يشيلوا نسر العلم.. ويحطوا مكانه خروف!