عالم فوضوي ..شعر أحمد أسامة

تعشق وَليف يسلَاك
تعشق وَطن يحْنِيك
بين غربتك جواك
وحدود بتشمَت فيك
الصدفة بتحب اللي مش بيحبها
ودا طَبعَها
الصدفة وارد تخدمك مِن قَلبها
والوقت مَارد..تحرَقه ينَسّيك
عيش اللي مَات مِنك وهو يعلّمك
دا الجَرح بيهدّك عَشان يبنيك
ما انتاش ضَعيف
ما انتاش جَدع
والفِكرة مش انك تكون حِمل الوَجَع
كَام م اللي قَبلك عَاش حَزين..شَيال
الفِكرة مين حَرّم
ومين تاني انخَدع
يختَل تَل..تدوس كِتافه تلال
.
.
يا قَلبي يا عَصفور
طَرح الخَطَاوي خَضَار
بس الغنا مَكسور
مِن رَعشِة المنقار
افرِد جناحَك لَجل تنسى الزَقزَقَة
وتبَدِّل الأحلام شَقا
مَسجون بَريء عَشمَان ف حَبل المَشنَقة
والحَبس بَارد..لَسعِته بتكويك
مِن ألف بَر لَمحتّه أصله سراب
السِرب قَادر بالوَنَس يحميك
ارحل فَصيح
ترجَع قَوي
طَعم الكَلام يحلّو كُل مَا يستوي
وانت اللي ياما شِرقت مُر كَلام
هَدّك نظام
حَلّق لعَالم فَوضَوي
دا مافيش سِكك للسما..مفروشة بالألغام
=========