الحقيقة المُرة

صريخ على ضريح الظلم اللي اتقتل جواه كان مظلوم.. صراخ من جرح غائر في قلبكم لا في قلبي أنا كان كلي أمل وعليّ الأمل على الآمال.. صرخت من الوجع وله من قلة الضرب على الجرح ماهو لو الجرح انضرب يمكن يروح منه الوجع ويمكن يزيد فيك الأمل.. لو كنت هنا أو حتى هناك هتسمع صراخي وصراخهم.. معايا لا مش مع بعض لأننا مبقيناش زى بعض.. الصراحة راحة.. والصبر أمل.. والحقيقة مُرة.. طب إزاى نقولها وهى مُرة وإزاى نرتاح ونصرخ بارتياح.. يا وجع يا وجع من كتر الألم.. يا جرح في الدماغ، عملوها الكلاب وسرقوا الدماغ.. الأغاني بقت مسخ واللي مسخوها قالوا هما عايزين كدا.. مين هما ومين انتوا يا ولاد البلاد.. يا سيد العباد متروح باللي اتسرق وتقول إنه اتحرق.. أو ما اتسرق.. ماهو اللي موجودين مش دريانين.. ولا حاسين بالصراخ بالرغم إن صوته عالي أوي.. واضح أوي، بس انتوا اللي بقيتوا من ظلمكم صامين.. ظلمكم كتر وفسادنا كتر.. ماهو فسادنا هو الأساس.. إحنا اللي اتخربنا وانتوا اللي خربتم.. خربنا خرابات.. وخربتم حاجات كتير كانت في دنيتنا حلوة.. حلوة بقت كلمة غريبة على مسامعنا.. بقينا نشوف المسخ أدام عيونا.. ومن غير ما نحس بإنه مسخ نقبله.. وانتوا اللي مسختوا كل شئ ومبقاش إلا شئ اللي هو يا ولاد البلد.. جدعنتكم راحت وبقت عصبجية واللي بيحميهم شوية حرامية.. الضربة هى هى.. والصرخة مش منتهية.. اتفرقوا الإخوات وراحوا بعيد والصرخة بقت في ودني وودنكم تتسمع من بعيد من غير ما القريب يسمعها.. واللي ما يسمع ياكل لما يشبع.. واللي أكل الحقوق ما بيشبع لأن عينه فارغة وقلبه خاوي من كل دين.. عقيدته إنه مستديم وحقيقته إن قوته جوه القلوب.. مع إنه كلب ولا يساوي الوجود.. والله موجود، والعدل موجود، والصراحة مكتومة جوه القلوب.. ده مش شعر يا ولد عمي.. دي حقيقة همي وأهلي وعيلتي ودمي.. حقيقة بنشوفها ونصرخ لكن صراخنا ما بيتسمع لأن السمع طبيعة إنسان، والإنسان في الأصل حيوان بالنسبة ليهم.. هما مين.. وهما مين.. دول كتير أوي بيحميهم اللي اتفسدوا واتغلبوا على أمرهم مين غلبهم هما برضه واتغلبوا ليه لأنهم ممسوخين.. ومن ممسوخ لممسوخ لمسخ المسوخ.. تبقي الحقيقة مُرة والحكاية مُرة.. والمرار جه منين من أصل الحكاية لما جم علينا ورفعوا عينهم في عنينا.. اتغلبوا والصراخ موجود بس الصرخة ما بتدوي في مكان ولا في الزمان اللي بيصرخ كأنه بيصرخ جوه منه.. واللي منه بيستغله.. ياه دا الحقيقة مرة والمرار نابع من قرار، قرار عالي أوي على كتاف الممسوخين على كتاف المظلومين.. والصرخة لسه موجودة بس على ضريح المظلوم.