سندريلا

شعر: أحمد شلبي
صورتك اللي
فوق حيطان اودتي القديمة
لسه موجودة وسليمة
زي اول مرة جيبتها في التسعينات
لسه بترش الفرح ع الموجودات
وبتبتسم لوشوش صحاب العمر اللي
بيعشقوكي من سنين
صورتك اللي ساكنة بين صور لحليم وسومة
مع بليغ وصلاح جاهين
ياما عاشت ويايا حاجات
شاهدة علي كل اللي فات
م المذاكرة للأغاني والكتب
وشايلة ارقام تليفونات
لسه عنوان الربيع ابو ورد طارح
يا جميلة الروح والملامح
سندريلا سعاد وزوزو
عشت رمز الحب والحزن النبيل
حلم بمبمي بينتقل من جيل لجيل
ضحكة صافية بتنطلق تملا الفضا
اد ايه بعدك مضي
وبفتكر زي انهاردة كل عام
يوم ما قاللي الراديو لندن بردها قتل الربيع
قلبي في ضلوعي انقبض
ولاقيت عنيا بتحضن الصورة في ذهول
وفضلت اقول
سندريلا عمرها ما تنهي الحكاية
سندريلا بتنتظر الساعة تضرب
تجري وتروح أوام
سندريلا اي حاجة تانية واردة
اختصرتي الحزن كله في نظرة واحدة
واختزلت الفرح كله في غنوتين
الف رحمة ونور عليكي
وياما ليكي مشتاقين