إبداع

عشان خاطرك
يسيل بجوار النيل فى بر مصر نهر آخر من الإبداع.. يشق مجراه عبر السنين والأجيال داخل نفوس المصريين.. فى سلسلة لم تنقطع.. وكأن كل جيل يودع سره بالآخر.. ناشرين السحر الحلال.. والحكمة فى أجمل أثوابها.. فى هذه الصفحة نجمع شذرات من هذا السحر.. للشعر.. سيد فنون القول.. الذى يجرى على ألسنة شابة موهوبة..
شارك مع فريق «روزاليوسف» فى تحرير هذه الصفحة بمشاركتك على rosareaders@gmail.com
عشان خاطرك
أبيعلك نفسي قطاعي
وألملم كل أوجاعي
وأعلقها علي دراعي
واقول :ياصبر سندني
وإسندني لما أميل
يجيني الصبر يتمخطر
وحاطط إيده في جيوبه
يقولي جتني متأخر
خلاص المر متسطر
علي جبينك وهدوقه
ألاقي ضلوعي تتكسر
وتوقع مني أوجاعي وتتبعتر
وألاقيني بلا داعي
أشوفك تاني بسمة نيل
وأرسم عينك العسلية
ضل نخيل
وأشوف ف الشعر
قلب الليل
وأشوف عودك بيتمايل
مع المواويل
وأتصاحب علي خيالي
أشوفك بنت خمرية
م خطرت يوم علي بالي
وياخدني الحنين ليكي
أسمع ضحكك العالي
بطعم الشفة وردية
ميدان مليان بحرية
وكان ياما كان
«حكاية من حكاوي زمان
أمير مسحور...ومحبوس ف القفص
عصفور..
وست الحسن بتغني لشط النور
يدوب السحر في غناها
كأنه ما كان»
وكان ياما كان
الشاعر- ياسر أبو جامع

باحبك
باحبك زى ما نكون
فكرتين ضاربين فى راس رايقه
باحبك زى ما نكون
توأمين قاسمين خلاص واحد
وضحكة أُمّ متضايقه
باحبك أرض طرّاحه
وباحبك أرض
مش طايقه انتظار الموت
باحبك مدنه وكنيسه وسكك وبيوت
باحبك دقّتين فى الهون
وتعويذه وفرَح ونقوط
باحبك فرحه فى البستان
وفنجان قهوه مش مظبوط
باحبك طفله بتهاتى
ف حوارى القلب من غير صوت
باحبك عشّ عصفرتين
بيضحك فوق شواشى التوت
باحبك كفّ فلاحه
وباحبك قلب بنت بنوت
باحبك كمسرى وشيّال
واحبك مسْتكه وزنطوط
باحبك سبحه وضفيره
وباحبك كيس عنب مفروط
وتنهيدة حصان مكبوت
لواد خيّال
باحبك خطوه للماريشال
واحبك ستّ لافّه الشال
واحبك هزّه فى الغربال
واحبك شعره م الشنب
اللى متزيّن بوِشّ الخال
واحبك فعل أو فاعل
واحبك فى الشدايد حال
واحبك فى الفرح تنهيد
واحبك فى الوجع موّال
واحبك رنتين خلخال
فى سوق فاضى
باحبك لمّا اكون رافضك
واحبك لمّا أكون راضى
واحبك لما اكون هربان
وجاى لك من زمن ماضى
واحبك حتى لو هادخل
معاكِِ لحضرة القاضى

شعر- سعيد حامد شحاتة

البنت
البنت اللى بتضحك للأزهار والناس
وتغازل طوب الأرض بخطوتها
وبتكتب أشعارها
للحصا والماس!
والمسا والضى الوناس
وبكل دفا وإخلاص
بتواسى الشقا بقصيدة أخر اليوم
تنزفها عالكراس
البنت / الوسواس
الساكن ننى الحرف
وقلب الإحساس
البنت المسكونة /الساكنة
الفاتحة /الداكنة
المكتوبة فى الأسطورة
جزيرة مزروع حواليها الحراس
أجناااااااااس
البنت التعبانة سفر
وغيوم كذابة
المعجونة حمااااااس
بتمسى على مغرب أيامها
وتقوله
اتمسى بالمواويل
الليل على روحى طويل
أناهاقفل بابي
واحضن أحبابي
واتهجى غيابى
وهانام بدري
أصلى تعبت خلاااااااص .

شعر- كريمة ثابت

خرم إبرة
تعتب علي مين
مفيش عاقل يعتب على حد
اصحاب الدنيا انفاس تنعد
ومحدش فاضي يركب حد
المركب علي كد صاحبها
مسحوبه بسلاسل الدين
فى بحور الهم
يلم خيوط الليل يفتلها بنور الشمس
ويدخلها فى خرم الأبرة
مبتدخلش
فمتستغربش
لو عدي عليك اللي قاسمته العيش والملح
ملفوف بهمومه
فى عيونه مطفية الشمس
وبيجري ف جوله مرماح
قدامه ارواح
كتاكيت ورا منه كرابيج الفقر ولا سلمش
حاسب متقولش
ده رماني ذى عقب سيجارة
قديم مكتوم ولا يسألش
تعتب على مين .

شعر- أحمد فخرى