معندناش قمصان

بمناسبة المسرح وسنينه اسمحولى اقولكم نكتة ف الأول... نكتة اليوم (زى طبق اليوم كده) بيقولك يا سيدى مرة واحد دخل محل ملابس طويل عريض علشان يشترى قميص... فى الدور الاول قال للبياع لو سمحت عايز قميص ... رد البياع بأدب شديد... حضرتك تحبه بكم؟ ولا نص كم؟ قال.. بكم.. رد البياع ... لا كده يبقى حضرتك تطلع الدور التاني.. طلع المشترى الدور التانى وقال للبياع فوق... لو سمحت عايز قميص بكم ... رد البياع بأدب شديد حضرتك تحبه سادة ولا مخطط ... قال سادة... رد البائع... لا ان كان كده حضرتك تطلع الدور التالت... طلع وقال للبياع عايز قميص بكم وسادة... قال البياع حضرتك تحبه كتان ولا حرير؟ رد الزبون بعصبية... كتان كتاااان... رد البياع... آه يبقى حضرتك تطلع الدور اللى فوق... طلع الزبون الدور الرابع وقال عاااايز قميص بكم سادة كتان ... قال له البياع هو حضرتك عاوزه كلاسيك ولا مودرن ؟ صرخ الزبون كلاسيييك... فرد البياع بأدب... عليك وعالدور الخامس حضرتك... وهكذا ظل الزبون المسكين يصعد ويصعد الى ان وصل للدور الأخير وقال للبائع وهو يلهث ابوس ايدك عايز قميص بكم سادة كتان كلاسيك بيتغسل ف الغسالة مابيكشش وبياقة بقى مافيش ادوار تانى؛؛؛ رد البائع بشياكة حضرتك ف المحل ده معندناش قمصان بس ايه رايك ف النظام ؟؟؟؟؟؟ فسقط الزبون مغشيا عليه...
مش عارف ليه افتكرت النكتة دى وأنا أشاهد المبانى الضخمة المكدسة بالبشر والمخصصة للانتاج المسرحى فى بر مصر... ألوف الموظفين ملمومين يا حبة عينى على مئات الفنانين وهات يا روتين وقيود وتعطيل لدرجة انى مرة لمحت واحد من زمايلنا الفنانين وسط الموظفين مخرشمينه ورق وهو عمال يقولهم كابتن كابتن هو كله روتين روتين مافيش بيروقراطية... الأغرب بقى ان بلد فيها الفنانين دول ممثلين على مخرجين على مؤلفين على مهندسين ديكور على مصممى اضاءة ومصممى أزياء.. مخضرمين و شباب زى الفل طابور طويل من الفنانين اللى يستاهلوا ألف قبلة على جبينهم ... ومافيش عروض... طاب ليييييه؟ اهو فيه ناس تقولك مافيش فلوس وناس تقول المسارح ف الصيانة وناس تقول البند وناس تقول النداهة ندهتهم لغاية الفنان ما يزهق من عيشة اللى خلفوه ويقرر يقضيها وظيفة بقى يمضى ف الكشف ويروح ويتحول لترس فى ماكينة لا تتحرك مطلقا ... صديق سمع منى المقالة قبل ما ابعتها قاللى حلوة جملة (معندناش قمصان بس ايه رأيك ف النظام) سميت المقالة ايه بقى يا عم خالد؟... قلتله ... سميتها... معندناش قمصان... ولما اندهش.. قلتله... هو انا اهبل اسميها... ايه رأيك ف النظام؟... سلامو عليكم بقى.