عايزين رئيس حقيقى

عايزين رئيس حقيقى
يقدر ياخد بإيدى
يشخط فى الخوف يخاف
يطلب لى العدل.. يجى
■ ■ ■
عايزين رئيس عظيم
واعر ومستقيم
يقول للفاسد اركع
عليك حساب قديم
■ ■ ■
عايزين رئيس مفتح
نشيط قوى وملحلح
يقوم الصبح بدرى
وعقله كمان مصحصح
■ ■ ■
عايزين رئيس جرىء
سياسى جامد عتيق
يقول للدنيا شوفى
بلدنا على الطريق
■ ■ ■
عايزين رئيس مقاتل
يدوس كل المشاكل
يعرف فين الحقيقة
ويخلى الكل ياكل
■ ■ ■
عايزين رئيس صريح
مين فينا مش جريح
يعالج كل مصرى
وضميره مستريح
■ ■ ■
عايزين رئيس مدقدق
يعرف إزاى يصدق
عارف شكل المنافق
ومين اللى عنده مبدأ
■ ■ ■
عايزين رئيس بسيط
تفكيره سهل وغويط
عاقل موزون كلامه
ما يحبش التنطيط
■ ■ ■
عايزين رئيس شريف
حلو اللسان عفيف
مايكشرش فى وشوشنا
وكمان يكون لطيف
■ ■ ■
عايزين رئيس مُهاب
له نظرة فى الشباب
يحمى الثورة اللى قامت
ويزيح عنها الضباب
■ ■ ■
عايزين رئيس يقدَّر
دور مصر المستحضَّر
مدنيَّة معاصرة جدًا
تاخد مكانتها واكتر


مناظرة جمهور الناخبين فى مقاهى «توك شو» المرشحين


بندق: عندك واحد شيشة وقهوة مضبوط وإزازة مية سقعانة قوى للأستاذ جلال كبير مؤيدى الرئيس المحتمل عمرو بيه موسى.
جلال: نزل حاجة ساقعة لكل الزباين يا بندق.
بندق: خير يا جلال بيه إيه كسبت البريمو.. ولا إيه.
جلال: أجدع من البريمو يا بندق.. عمرو موسى هو اللى جاب جون كبير قوى فى الماتش اللى كان بينه وبين الدكتور أبوالفتوح.
بندق: ألف مبروك.. حاجة ساقعة للقهوة كلها يا معلم.. بمناسبة الجون اللى جابه عمرو موسى يا جدعان.
أبومصعب: أنا لا أقبل أى حاجة ساقعة من أنصار موسى.. وهذه النتيجة مزورة.. والدكتور أبوالفتوح هو الذى قضى على عمرو موسى بالضربة القاضية.
جلال: اتكلم على قدك يا باشمهندس.. عمرو موسى هو اللى يكسب.
أبومصعب: أولاً أنا مش مهندس.. أنا داعية وكبير المؤيدين للدكتور أبوالفتوح.
جلال: يا عم روح اقرا برنامج الدكتور.. وتعالى ناقشنى.
أبومصعب: ويعني أنت اللى عندك برنامج عدل قوى يعنى.
جلال: أنا ما عنديش برنامج لكن عمرو موسى هو اللى عنده برنامج جاد.
أبومصعب: وإحنا عندنا مشروع للنهضة.
جلال: يا عم نهضة إيه.. البلد محتاجة تخرج من الأزمات اللي هي فيها وبعدين أبقي دور علي النهضة براحتك.
أبومصعب: النهضة أهم من أي برنامج.
جلال: مش الأول نخلص من الانفلات الأمنى.. ونلم البلطجية اللى فى الشارع.. والمساجين اللى هربوا يوم 28 يناير ومارجعوش لغاية دلوقتى.. ونشوف الاقتصاد المتنيل على عينه.. والأجور اللى ما تجبشى طقة لعيلة.. والوقفات الاحتجاجية.. والدستور اللى لسه ما تكتبش.. وتهديدات الكيان الصهيونى.. ومشكلة القمح والبنزين والسولار.. و..و..
أبومصعب: مشروع النهضة هو اللى ح يحل مشاكلنا دى كلها.
جلال: هى دى مشاكل يا هندسة.. دى كوارث دى مصايب.. دى بلاوى مسيحة.. مش نحلها الأول.. وبعدين نعمل النهضة.
أبومصعب: هذه هى روح اليأس والانهزامية وعدم الثقة بالنفس.. مشروع النهضة هو دستورنا.. وطريقنا إلى العالمية.
جلال: إلا قولى يا شيخ مصعب.. هو مشروع النهضة ده مش كان بتاع الباشمهندس الشاطر.. وبعدين انتقل إلى «الاستبن».. آسف قصدى إلى الدكتور مرسى.. إيه بقى اللى جاب النهضة هنا لأبوالفتوح.
أبومصعب: يا حبيبى.. احنا عندنا مشروع نهضة واحد ينفذه الشاطر مرسى.. أبوالفتوح متفرقش معانا.. المهم إن أى واحد فيهم ينجح وينفذ المشروع.
جلال: هو مش أبوالفتوح خرج عن طاعة المرشد العام.. ولا يمثل الإخوان ولن ينتخبه أعضاء الجماعة.. وليس له أى مشاريع للنهضة.
أبومصعب: النهضة دى بتاعتنا كلنا.. نهضة الشاطر.. هى نفسها نهضة محمد مرسى.. هى بعينها نهضة أبوالفتوح.. يعنى من الآخر.. إحنا ح نفوز يعنى ح نفوز بالذوق بالعافية ح نفوز.
جلال: لأ.. كده طمنتنى يا شيخ.. يعنى احنا رايحين ناحية تمثال نهضة مصر عدل.
أبومصعب: لأ.. «نهضة مصر».. آه.. لكن تمثال نهضة مصر بتاع الكافر «محمود مختار» فهذه الأصنام سيتم هدمها هى وكل المساخيط اللى عملوها الفراعنة الكفار.
جلال: لأ.. كده طمنتنى.. أنا كده أبصم لك بالعشرة إنه عندكم فعلاً مشروع للقضاء على النهضة.. وسلم لى على مشروع النهضة الحقيقية وأنت ماشى.



■ تقول حكمة صينية قديمة:
إن الشق الذى يتوسط حبة القمح يؤكد أن النصف لك.. والنصف الآخر لأخيك.
■ ويقول أحد زعماء حزب الحرية والعدالة:
إن (الواو) التى تتوسط كلمتى (الحرية).. (والعدالة) تؤكد أن نصف الحرية لجماعة الإخوان المسلمين.. والنصف الآخر لأعضاء حزب الحرية والعدالة.
■ ويقول أحد زعماء السلفيين:
إن الفاصل الذى يتوسط قاعة البرلمان يؤكد أن نصف مقاعد البرلمان كان يجب أن يكون لأعضاء حزب النور.. أما النصف الآخر فكان يجب أن يذهب لحزب الحرية والعدالة.


مساااااااء الفل


■ من المخجل أن تتعثر مرتين بالحجر نفسه.
■ ولا يلدغ المرء من جحر مرتين.
■ واللى يتلسع من الشربة ينفخ فى الزبادى.
■ واللى انتخب الإخوان والسلفيين.. ووعدوه بالجنة.. اكتشف إن نار «الحزب الوطنى».. ولا «جنة الإخوان».. وإن «الفلول» أرحم من «حزب النور».

■ قد يجد الجبان خمسين طريقة لحل مشكلته.. ولكنه لا يعجبه سوى طريقة واحدة وهى «الفرار».
■ وقد يجد رجل الأمن خمسين طريقة لفض الاعتصام.. ولكنه لا يعجبه سوى طريقة واحدة وهى «ضرب النار».
■ وقد يجد الإخوانى خمسين طريقة لحل مشكلته مع الليبراليين.. ولكنه لا يعجبه سوى طريقة واحدة وهى «اتهامهم بالكفر ليدخلوا النار».

■ تريد المرأة أن تكون الأخيرة فى حياة الرجل.. ويريد الرجل أن يكون الأول فى حياتها.
■ يريد بعض المتأسلمين أن يأمموا النصف الأسفل للمرأة.. وتريد المرأة أن تأخذ نصف مكافأة نائب البرلمان الذى يريد أن يحولها لجارية.. فيما تحاول هى أن تحوله إلى عبدٍ لشهواته.
■ المرأة نصف المجتمع فى كل المجتمعات المتحضرة.. والرجل كل المجتمع فى المجتمعات العربية.