نشطاء الفيس: وظيفة الإعلام في الدول المتأخرة "إنه يشتغلك"

دشن نشطاء علي موقع التواصل الإجتماعي صفحة بعنوان "عشان مايضحكش عليك " للتعريف بطريقة التعامل مع وسائل الإعلام المختلفة وكيفية استقاء المعلومات منها.
ونشرت الصفحة معلومات عن طبيعة وسائل الإعلام بطريقة ساخرة قائلة :- "الحقيقة إن وظيفة الإعلام في الدول المتأخرة، هي "إنه يشتغلك"، يعني ممكن نقول نسمي وزارة الإعلام "وزارة الإشتغالات العامة" ولإن دوره مش بس الاشتغال، لكن كمان التطبيل، فممكن نخليها "وزارة الاشتغالات والتطبيل العامة"".
وأضافت: "أول حاجة يا سيدي تعرف الجرنال اللي في ايدك، أو اللي في شاشة لاب توبك، أو ف آي بادك، بتاع مين يعني؟ مين بيصرف عليه؟" ..أيوا مهو كل جرنال وكل خبر وكل كلمة بتتقال في الإعلام ليها "ممول"..الممول ده هو الشخص اللي دفع من فلوسه مخصوص عشان يقولك حاجة، والحقيقة البسيطة دي نطلع منها بكام نتيجة"
وأستكملت الصفحة: "اكيد الراجل مش دافع دم قلبه في القناة عشان يطلع مذيعين يشتموه؟ أو كاتب محترم يطلع يشوه صورته ف جرناله ! ، ولو ده حصل يبقى أكيد في إنّ، وإنّ بسيطة للغاية، حرب صغيرة، وخناقة، بيحصل فيها ايه؟؟ مش ناس كتير بتتلم وتتفرج؟ هي دي زيتونة الموضوع، خناقة كبيرة عشان الناس تتلم وتتفرج، ويبقى له عدد مشاهدات كبيرة تزود من تسعيرة الإعلانات بتاعته –اللي بتكسبه"
وتابعت: - "- التحدي الأول لأي جرنال "جذب القاريء" عشان يشتريه، ولأي موقع جذب القاريء عشان يحصل على أكبر عدد من الزيارات، وبالتالي يجيب اعلانات وينجح، لكن للأسف في احيان كتير ده بيجي على حساب المهنية، فتلاقي الخبر ومعاه شوية تحابيش مش حقيقية لجذب القاريء..أو خبر كاذب أصلا اتنشر بدون التأكد من مصادره عشان خبر سخن وهيجيب ناس كتير للموقع..أو هيخلي ناس كتير تشتري الجريدة."
ونشرت الصفحة لينك موقع مؤشر المصداقية للتأكد من صحة الأخبار المنشورة في الجرائد المختلفة والتي أحتلت شبكة رصد فيه المركز الأول إلي الآن لشهر أغسطس.