مجرد دوشة دماغ

مجرد دوشة دماغ .. عاوز تسمعها .. يبقى انت اللى جبته لنفسك ..
عاوز تسيبك منها .. يبقى خير ما عملت ...
فى الأسبوع اللى فات دة جاتلى كمية دعوات لصفحات .. أمثال ..((كلنا ضد حريق المصحف الشريف )) .. و كل هذة الصفحات ...و بغض النظر عن إنى بشوف إن الصفحات دى لا بتقدم و لا بتأخر فى حاجة .. إلا إنى سألت نفسى سؤال مهم ..: هل كل المسلمين المشتركين فى هذة الصفحات .. بيفتحوا المصحف و يقرأوا فيه كل يوم .. و هل فى حياتهم العادية .. بينفذوا كل الكلام اللى فيه ؟؟ ... طبعاً .. الإجابة المنطقية ..كانت لأ ..لأن لو كان دة حاصل .. كنا أكيد كأمة إسلامية هنكون أقوى من كدة .. كنا أكيد هنكون شعوب بتضيف للعالم .. و قادرة تتحكم فى العالم ... فمش كل شوية يطلع واحد يهين ديننا .. و معتقداتنا ...لو كنا بنفتح المصحف بجد .. كان أكيد طريقة تعاملنا مع بعض و طريقة تعاملنا مع غيرنا .. هتكون مختلفة .. و انطباع العالم عننا .. هيكون إننا شعوب على دين متحضر و متسامح .. مش دين إرهاب كما يظنون .. لكن للأسف المصحف بالنسبة لمسلمين كتير .. كتاب و صفحات ورقية .. مش أسلوب للحياة ...
قال رسول الله صلى الله عليه وسلم : " تركت فيكم أمرين لن تضلوا ما تمسكتم بهما : كتاب الله وسنة رسوله " .
بحب أووى ادخل على مواقع الأخبار .. مش عشان اقرأ الأخبار اللى فيها .. إنما بيثير استمتاعى أكتر التعليقات اللى بتبقى على الأخبار نفسها .. و اللى بلاقي معظمها ... ملوش أدنى علاقة بالخبر نفسه .. يا إما بتكون خناقة بين الناس اللى بتعلق على الخبر .. ودة يخلينى أقول لأى حد إنك لو قريت حتى خبر خلاك تبكى من كتر ما فيه .. فقراءتك للتعليقات اللى عليه كفيلة بإنها تفرفشك للسنة الجاية ..
معرفش ليه .. أى اتنين عرب بيجوا يتكلموا عن مشكلة فلسطين ..بيسيبوا فلسطين بكل ما فيها من مصايب و ناس و أطفال كل يوم بتموت .. و يفضل كل واحد فيهم يعاير التانى .. و يتهم بلد التانى بالخيانة و التطبيع مع إسرائيل .. إنما كلام عن فلسطين نفسها ..و بإيد كل واحد فيهم يعمل ايه .. فمتلاقيش
مرة دخلت ع اليوتيوب .. كنت بشوف فيديو لعمرو خالد .. و بالرغم إن الكلام اللى فى الفيديو كان أكتر من رائع إلا إنى لما حبيت أشوف فيديوهات تانية ..لقيت معظمها من عينة .. الرد على تخاريف عمرو خالد ... و اكتشفت بعد كدة إن مع كل فيديو دينى لعمرو خالد .. أو مصطفى حسنى .. أو غيرهم من الدعاة اللى بيأثروا فيا و فى ناس كتير زيي .. و بيقروبنا أكتر لديننا ... فى فيديو بيسب و يشتم فيهم و يكذبهم ... و للأسف بتلاقى الكلام دة من ناس المفروض برده أنهم بيتكلموا فى الدين .. واللى المفروض يوم ما ينتقدوا تبقى بطريقة حسنة .. لكن هذا شئ لم أجده ..
سؤال .. هيموتنى من الفضول أو الحيرة إنى أعرف إجابته .. هما على أى أساس بيختاروا وزير التربية و التعليم .. يعنى المفروض منصب زى دة اللى يمسكوا يكون شخصية ذات فكر .. و يكون حد عنده القدرة أنه يقدر يضيف و يطور العقول .. بشوف إنه المفروض يكون ... مفكر أو عالم ... أو يكون عمل أى إضافة للفكر المصرى .. أو الجانب الثقافى أو العلمى فى مصر .. عشان يكون عنده القدرة إنه يطور من العقلية المصرية .. مش إنه يطلع يحرق دمنا كل سنة فى امتحانات الثانوية العامة بالكلمة المشهورة : الامتحانات فى مستوى الطالب المتوسط .. ..!!
ضحايا التعليم المصرى ..
أكتر حاجة لفتت نظرى فى موقع الجود ريدز .. إن لو دخلت على بروفايل أى واحد أجنبى .. فمعدل الكتب اللى بيكون قريها فى الغالب بتكون أكتر من ألف و حاجة كتاب .. و دة الشئ النادر جدا إنى ألاقيه عند شخص عربى ..و لكن البركة فى ماما سوزان و مهرجان القراءة للجميع ...