بالصور.. أكشاك "محاربة الغلاء" تتحدى قرار رفع الأسعار.. واللحوم ب 35 جنية

أكشاك "محاربة الغلاء"
كتبت- مارينا ميلاد
"دايماً مكنتش بشترى أى لحوم من الاكشاك لانها مش مضمونه و مش معروف مصدرها ، لكن الغلاء اللى احنا فيه و اللحمة اللى بتتباع فى الجزارة ب 60 و 70 جنيه هى السبب"،هكذا قالت الحاجة فاطمة ،إحدى المترددات على أكشاك بيع اللحوم و السلع الغذائية ، مؤكده على تخوفها من تناول تلك اللحوم و الدواجن رخيصة الثمن ، خاصة بعد سماعها تحذيرات من تناولها :"خايفة لكن بقالنا دلوقتى حوالى سنة بناكل من اللحمة دى و الحمدلله محدش حصله حاجة ، وربنا يسترها بقى".
كيلو اللحم ب 35 جنية ، كيلو الدجاج ب 17.5، 8 أكياس مكرونة أو 3 كيلو أرز ب 10 جنيه ، و 3.5 لأى نوع من الخضروات المجمدة ، هذه قائمة بأسعار منافذ بيع السلع الغذائية التابعة للقوات المسلحة أو الأحزاب أو حملة "محاربة الغلاء" التى انطلقت مؤخراً.
و بعد انتهاء الاسبوع الأول من شهر رمضان .. تباين الاقبال على معظم الاكشاك، وذلك لان أغلب المواطنين حصلوا على احتياجاتهم فى بداية الشهر- حسبما قال المسئول عن أحد المنافذ التابعة لحزب الجيل فى منطقة عين شمس،ويضيف:"عربية الحزب بتيجى كل شهر و تنقلنا السلع ، و الاقبال الايام دى و من قبل بداية رمضان كبير جداً ، لان الاسعار اللى بتتباع بيها السلع برا محدش من الغلابة يقدر عليها".
و عن مصدر اللحوم يقول:"السلع بتجلنا و احنا نبيعها زى ما هى منعرفش حاجة تانية ، لكن احنا حاجتنا نظيفة و محدش اشتكى منها" ، و يوضح أن هذا الكشك مدعم من القوات المسلحة و باشراف منها،وهو ما يؤكد سلامة المنتجات.
بوجه شاحب و جسم نحيل و ملابس باليه يأتى عوض عبد الكريم،الذى يعمل نقاش ، من مسكنه فى باب الشعرية إلى أقرب كشك له فى منطقة الأزهر لشراء مستلزماته الضرورية و هى المكرونة و الارز ،ويوضح أنه لا يستطيع شراء الدواجن و اللحوم كل شهر ، مستنكراً قرار زيادة الأسعار ، متسائلاً :"الغلابة اللى زينا يلاحقوا منين على كل ده؟".
لم يختلف المشهد كثيراً فى أى من الاكشاك التى توجد بكثرة بمنطقة الالف مسكن ، الدراسة ، المطرية ،عين شمس ، من حيث الاسعار و إقبال المواطنين، لكنها تختلف فى الجهة المشرفة على الكشك إن كانت مرخصة و تابعة للقوات المسلحة أو حزب بعينه أو لاحدى الشخصيات أو إنها تكون أكشاك عشوائية غير مرخصة و غير معلوم لأى جهة تنتمى.
أكشاك "محاربة الغلاء"
أكشاك "محاربة الغلاء"