آخر كلام

× إعلام "ماقاللى وقلت له ياعوازل فلفلوا" فيه حاجة محيرانى..!
فهل تتصور يا مؤمن إن قناة فضائية تابعة لدولة عربية تحمل اسم مصر ينتقد مذيعوها كل يوم؛ بل يهاجمون بعنف، كل كبيرة وصغيرة فى مصر.. بل وأى مسئول مصرى كبير كان أو صغير ..؟!!
طيب هاأبسطها لكم.. هل نتخيل، ولو فى الأحلام، أن تسمح أى دولة عربية لمصر بعمل قناة تحمل اسم هذه الدولة العربية؛ وتنتقد أوضاعها الداخلية وتؤلب عليها مواطنيها بصورة فجة يوميا..؟!
طبعًا أنا هاسيب الإجابة للمسئولين عن إعلام ما قال لى وقلت له ياعوازل فلفلوا..لأن إجابتى أنا صعبة حبتين.. لأنها قد تخدش الحياء العام..!!
× واضح أن وزير التموين راجل طيب وعلى نياته.. فقد أعلن صراحة إن الحكومة لا تستطيع أن تجبر أى تاجر على خفض الأسعار.. وهو كلام جميل وكلام معقول ماأقدرش أقول حاجة عنه، على قولة المطربة ليلى مراد..!
لكن الوزير نسى أو تناسى إن ما يفعله التُجّار بالسوق هو احتكار؛ وأن هناك جهازًا طويلاً عريضًا اسمه جهاز حماية المنافسة ومنع الاحتكار مهمته محاسبة ومعاقبة المحتكرين؛ فلماذا لا تلجأ إليه الحكومة لضبط السوق وردع المحتكرين..؟!
هى حاجة من إتنين: إما أن الجهاز نايم فى سابع نومة والحكومة مكسوفة تقلق منامه..أو أن الجهاز كله راح فى الوبا زى ماراحت هنادى يا أمااااى..!
أنا شايف إن الجهاز راح فى الوبا وهو نايم فى سابع نومة..!
× أنا عندى فكرة بمليون جنيه.. ليه الحكومة ماتعملش قعدة عرب مع ممثلى التجار وتوزع على كل واحد منهم رغيف عيش من بتاع بطاقات التموين علشان يحلف بالنعمة على عينيه أنه مش هايرفع الأسعار..؟!
المشكلة هنا مش فى التجار اللى هايرجعوا فى كلامهم بالتأكيد.. لكن المشكلة فى رغيف عيش التموين اللى لا ينفع يتاكل.. ولا ينفع حتى يتحلف عليه..!
× زى ما توقعت من أسبوعين إن أزمة "مبوسة" حفلة الساحل هاتنتهى على طريقة الريس حنفى شيخ الصيادين؛ اللى كلمته مابتنزلش الأرض أبدًا..!!
وتوتة توتة خلصت الحدوتة؛ واللى يحب العريس والعروسة ما يضربش نار.. وسمعنى يا جدع سلام نشرة الأخبار..!!
آه يا دماغى..!!
× راقصة من إياهم بتؤكد إنها مابترقصش فى أى كباريهات بيشربوا فيها خمور لأنها حرام..!
يا سلام على التقوى.. اللهم قوى إيمانك يا طاهرة..!
فكرتنى بنكتة الخمورجى اللى بيشرب الخمرة بإيده اليمين؛ لأن الشرب بالإيد الشمال.. حرام..!!