لولادى اللى فى ميدان التحرير يا شهر طوبة أمانة توصى أخوك أمشير.. يحن على الولاد إللى نايمه فى التحرير ويبطل الزعابيب.. ويجيب لى أى طبيب.. هناك من العطفه.. يوصف لهم وصفه.. تدفى.. أوصالهم.. أصل الندا.. طالهم.. والتلج سيّح دمعهم.. والأرض روّت دمهم.. والذل بدد حلمهم.. بلقمة.. وهدمة.. وفاتحة خير.. تبقى الصبيّة للصبى.. من بعد فاتحة النبى.. أصل النوبة دى يا طوبة البُشرة بشرة خير. ●●● أمانة عليك يا طوبة توصى أخوك أمشير يحن على الولاد إللى نايمه فى التحرير ●●● وتوت توت.. توت توت يا مصر توت يا صبر توت توت توت يا مر توت توت توت والصعب فات توت توت والفجر آت توت توت وآهى علقة تفوت توت توت ولا حد يموت توت توت وإن حد مات توت توت نقراش الحنة توت توت والحنة عشانك توت توت يا زاينة مكانك توت توت ومكانك عالى توت توت عشقى وموالى توت توت مصر يا محروسة توت توت أنا نفسى فى بوسة توت توت أسكر وأدوب توت توت فى حبك دوب توت توت زى المجذوب توت توت على باب الست توت توت ست الستات توت توت وكنيسة العذرا توت توت يا ست يا ناظرة توت توت سيدنا الحسين توت توت يا أبا العلمين توت توت النور ده منين؟ توت توت من رمل سينا توت توت أرواح أهالينا توت توت أحمد وجرجس توت توت مرقص وجمال توت توت على الكنال توت توت رمسيس ومينا توت توت أحمس وتحوووووووت.