أنا والسياسة

كتبت : شيماء فكرى .... أنا والسياسة.. بقت حاجة كده زى ناقر ونقير، يعنى الأول ولا كنت فاهمة أى حاجة فيها زيى زى بقية الشعب، بس عارفة إن هى حاجة وحشة أخرتها أمن الدولة، وطبعا كلنا عارفين يعنى إيه أمن الدولة، وبعد كده الثورة قامت وكلنا بقينا بتوع سياسة، يعنى مثلا تروح تلاقى أبوك بيتخانق مع أخوك علشان السياسة، ومامتك بتتخانق مع الجيران علشان السياسة، تمشى فى الشارع تلاقى الكلاب بتتخانق مع القطط علشان السياسة، تركب المواصلات تلاقى السواق بيتخانق مع الركاب علشان السياسة، تروح الشغل تفتح الفيس تلاقى كل أصحابك نازلين فيك شتيمة علشان السياسة، بجد بقت حاجة تحزن، أنا مش ضد إن احنا نفهم السياسة، وكل واحد يبقى ليه وجهة نظره السياسية، بس هو إحنا منعرفش نتكلم ونتفاهم بديمقراطية ولا لازم يعنى نشتم ونتخانق علشان كل واحد يثبت إنه سياسى محنك، أنا حتى معرفش يعنى إيه محنك، بس بسمعهم بيقولوا كده، المهم بقى أنا قررت اتفرج وادعى ربنا إن الحال ينصلح، لأن كده مش هينفع، لما نبقى كلنا 80 مليون سياسى مفيش منا اتنين متفقين على حل يبقى هتخرب إن شاء الله، علشان كده أتمنى من كل الناس اللى ملهمش فى السياسة قوى زيى كده يقعدوا يتفرجوا ويدعوا ربنا، ونسيب الناس بتوع السياسه المحنكين هما اللى يمشوا الدنيا، ولو حسينا إنهم مش نفعين نبقى ياعم نستوردلنا ناس أو حتى نروح ناخد كورسات سياسة بره البلد علشان نتعلم السياسة الأول وبعدين نتكلم فيها.. ولا إيه رأيكم؟