* سألنى بعض كبار الصحفيين المحترمين سؤالاً مباغتاً: إنت مش شايف إن د.يحيى الجمل نائب رئيس الوزراء رغم قيمته وقامته كأستاذ قانون إلا أنه أصبح عبئاً على الحكومة بعد أن أفسد معظم الملفات التى تولاها..؟! قلت لهم: جرى إيه يا جماعة.. هو اللى باعمله فى المسئولين هايطلع علىَّ وللا إيه..؟! دا أنا لسه مابقاليش أسبوع فى منصب رئيس التحرير، واسمى مكتوب بالرصاص وماقعدتش لسه على الكرسى وباطلّع المجلة من مكتبى القديم المتواضع.. انتم عايزين ترفدونى وللاإيه..؟! عموماً.. أنا شايف اللى بيعمله د. الجمل وأنتم شايفين، لكن من الواضح أن د.عصام شرف رئيس الحكومة لسه مش شايف..! وسمعنى يا جدع أغنية «باودعك آخر وداع»..!! * الدمعة كانت هاتفر من عينى والكابتن حسن شحاتة بيقول إنه هايستمر فى تدريب منتخب كرة القدم من أجل مصر، ومن أجل تحقيق المزيد من «الإنجازات».. أيوه والله العظيم المزيد من إنجازات..!! يا أبو كريم.. أرجوك كفاية إنجازات وإذا كنت هاتستمر علشان خاطر عيون مصر.. فأقدر أقول لحضرتك يا أبو الكباتن إن مصر اتصلت بىَّ امبارح الضهر وقالت لى قول لأبوكريم.. «أرجوك ارحل.. احنا مش هانرحل»!! * بعد أن أزالت جمعية «المساعى المشكورة» بالمنوفية تمثال نصفى لمبارك وشطبت اسمه من على كل اللوحات الرخام.. أقدر أقول لهم.. «سعيكم مشكور»!! * إلى ضباط الشرطة الشرفاء: أرجوكم كلبشوا عربياتنا.. اكتبوا لنا غرامات وهمية.. غلسوا علينا واسألونا عن شنطة الإسعاف والحزام.. اعملوا أى حاجة بس نرجوكم ترجعوا..! وحشتونا..! * أستاذى الكاتب الكبير المحترم أرسل لى كلمتين بخطه المنمنم الجميل يقول: مبروك.. انت قدها وقدود..!! مليون تحية وتعظيم سلام لأستاذى صاحب الأداء الهادى.. الأستاذ رجب البنا..!! * والله العظيم مش باهزر.. قناة موجة كوميدى بتتعرض للتشويش.. واضح إن صاحب التوك توك بتاع زنجة زنجة واخد على خاطره منها..! * كلمة ورد غطاها: * بالمناسبة إيه آخر أخبار الأخ «الحقيد».. احنا مش سامعين له أى حس أو خبر..؟! ** يا سيدى «التوك توك» بتاع حضرته بعافية شوية لأنه وهو بيطارد الجرذان وشذاذ الآفاق من «زنجة لزنجة».. اتزنق فى زنجة من الزنجات.. فبقى لانافع «توك توك».. ولا بسكليته.. نقول إيه..؟! ربنا يشفى.. مش قصدى التوك توك طبعاً..!